O Orfeón Lucense cantará na solemne celebración o venres, 9 de febreiro, a partir das 20.00 horas, na Catedral de Lugo.

Cantando panxoliñas

Con Xulio Xiz, Presidente do Orfeón

Acto de entrega da Medalla de Ouro do Concello de Vilalba a Xulio Xiz, xornalista e gran dinamizador da cultura nado neste Concello. Por toda unha vida adicada a colaborar e organizar miles de actos e homenaxes, presentador e mantedor de diversos eventos, e membro do xurado do Certame Literario do Excmo. Concello de Vilalba desde a súa orixe 

Polos seus destacados méritos e polos relevantes servizos prestados ao noso pobo, o Concello de Vilalba fará acto de entrega desta distinción a Xulio Xiz, o venres 29 de decembro ás 20:30h no auditorio municipal Carmen Estévez de Vilalba. Acto aberto a todo o público.

Web do Concello de Vilalba.

Feliz Nadal

E así foi: no serán do sábado, 23 de decembro, cantamos para felicitar o Nadal dos lucenses na igrexa da Nova. Esta é unha foto desa noite especial.

E así o contou a prensa:

Concerto de Nadal

Todos os anos, coma unha tradición, o Orfeón Lucense ofrece un concerto durante o Nadal co desexo de agradecer aos lucenses a fidelidade e o afecto que recibimos deles, ao longo do ano, cada vez que cantamos.

Este Nadal non será unha excepción: A véspera da Noiteboa, cantaremos outra vez para que revivan en todos os corazóns as cancións de sempre xunto a pezas completamente novas no repertorio do Orfeón, e mesmo algunha, composta por José Castiñeira, o noso fundador, que non se volveu cantar en décadas e que agora volve brillar, coma un tesouro.

E non cantaremos sós: cantará connosco o Coro de Nenos da Parroquia de Santiago a Nova, e contaremos co talento de Nacho Samena ao piano e Aquilino Jacob á guitarra.

Hoxe presentamos o cartel, que xa está na imprenta, e que pronto veredes por toda a cidade para lembrarvos que vos esperamos, como cada ano, para vos felicitar o Nadal.

Apoio ao banco de alimentos

Santa Cecilia

Coma outros anos, tamén este participaremos na celebración de santa Cecilia, padroeira da Música e dos músicos, xunto cos restantes coros e agrupacións da cidade. 

Será na Catedral de Lugo o próximo 22 de novembro, ás 8 da tarde.

Volvemos

Estamos en setembro, e, despois destes meses de descanso, o Orfeón Lucense reanuda as súas actividades e rutinas no local de sempre na rúa do Cruzamento, e baixo a dirección de Marcos Fernández Mosquera.

Nuns días empezaremos os ensaios, en poucas semanas cantaremos a misa solemne ao patrón San Froilán e tamén a tradicional misa latina que clausura as festas, logo a celebración da padroeira da Música, a seguir, o Nadal... e así un ano máis.

Haberá novidades no repertorio e na disposición das cordas, tamén haberá voces novas e novos proxectos, e é que o Orfeón, aos 35 anos da súa refundación, segue renovándose para non perder a súa identidade. 

Grazas a todos polo voso cariño e fidelidade. 

Concerto de Fin de Curso do Orfeón Lucense

Convidada especial: CORAL DO LICEO DE OURENSE 

Igrexa de San Pedro (Lugo) - Sábado, 24-xuño-2017 20,00 h

CORAL DO LICEO DE OURENSE 

Directora: Yolanda Grela Betoret

Edelweiss (Sonrisas y lágrimas)                               R. Robger
Vita nostra (La Misión)                                            M. Travic
Moon river (Desayuno con diamantes)                    H. Mancini
Coro de espigadoras (La rosa del azafrán)              J. Guerrero
Coro de románticos (Doña Francisquita)                 A. Vives
Mozos y mozas (La del soto del parral)                   Soutullo y Vert
Canción del arlequín (La Generala)                         A. Vives 

Solistas: Teté Torre e Elena Álvarez

  Pianistas: Ángel Losada e Luis Humberto

ORFEÓN LUCENSE 

Director: Marcos M. Fernández Mosquera 

Sanctus e Benedictus (Missa brevis)                         Jacob de Haan
Cantique de Jean Racine                                           Gabriel Fauré
Hallelujah                                                                  L. Cohen (arr. Roger Emerson)
Annie´s Song                                                             John Denver
Ó Rama (Pop. Portuguesa)                                        Arr. Adelino Martins
Canto de berce                                                Xosé Luís Rivas-Mini (arr.Lupe Enríquez)
Eu de Marín ausenteime                                           G. Bernal
Cando vexas (Pop. Galega)                                      Arr. José Castiñeira

 Solistas: Ángeles Rodríguez Fontela, Javier Pérez Schofield e Francisco Javier Rodríguez García 

Pianista: Ignacio Sampayo

Voces masculinas de 8 coros cantarán juntos la Alborada de Veiga

Enlace coa páxina de La Voz de Galicia, aquí.

Día das Letras Galegas

Foto do concerto no Círculo das Artes a prol de Manos Unidas

Letras Galegas

Concerto de Primavera

Concerto "Mans Unidas"

O domingo 14 de maio ás 20h no Círculo das Artes de Lugo terá lugar o Concerto solidario que xa vén sendo tradicional nos últimos anos.
Da Escola Municipal de Música de Lugo, actuarán o Grupo de pandeiretas (dirixe Mercedes Autram), o Coro Moderno (dirixe: Noelia González) e a Big Band (dirixe: Adrián Lage).
E tamén intervirá o Orfeón Lucense (dirixe: Marcos Fernández Mosquera).
As entradas (5 euros) poden recollerse anticipadamente no mercado solidario da rúa San Pedro ou na sede da Delegación (r/ Cruz, 1 B de 11 a 13h).

Luís Vázquez Muñiz

Hoxe, ao Orfeón Lucense (tamén aos queridos compañeiros do Coro de San Francisco Javier), correspóndelle a difícil tarefa de cantar para despedir a un amigo, a un dos nosos, a un querido compañeiro de moitos tempos, moitos traballos, algunhas dificultades e moitas alegrías.

O labor dun colectivo musical é disfrutar do exercicio da voz, de cantar, cumprindo o que aprendemos de pequenos de que rezar é “levantar o corazón a Deus”. Pois nós rezamos cantando, para pedir, pero tamén para darlle gracias ao Altísimo, especialmente cando cantamos en recintos sagros coma este; especialmente cando cantamos en momentos coma este.

Hoxe cantamos rezando para pedir e para dar grazas. Para pedirlle ao Señor que acolla no seu seo ao noso compañeiro Luis, e tamén para darlle grazas por tantos anos de amizade e convivencia co noso amigo Luis.

Primeiro era Luis do Banco Exterior, e así o coñecín hai xa preto de trinta anos… Pero daquela e sempre era xa Luis do Orfeón Lucense, un dos máis veteranos. Un dos procedentes dos tempos afortunados nos que Don José Castiñeira refundou este Orfeón para deixárnolo en herdanza a todos os que iamos tendo algo que ver cun colectivo senlleiro que conforma unha gran familia, que ten por norte elevarnos conxuntamente por medio da harmonía da canción; por medio da expresión colectiva, igualitaria, de erguer os corazóns e deixar que a música nos invada, flúa, e nos transporte a un mundo musical, case perfecto.

Luis era cantor solidario, responsable, serio, amigo… amigo de todos; absolutamente de todos. Nunca lle escoitamos unha palabra discordante… Sempre no seu lugar de home bo, responsable, ao que se podía acudir para falar e para pedir axuda. E consello. E tranquilidade. Durante moitos anos foi o responsable da economía do Orfeón, e nunca como entón tivemos organizadas as sempre precarias finanzas dun colectivo sen ánimo de lucro pero cunha complexa organización e funcionamento.

Hoxe, todos vós sodes testemuña, cantamos por Luis, cantamos a misa de Don José Castiñeira, que tanto lle gustaba, cunha aportación extraordinaria do noso Director, Marcos Fernández Mosquera… xa dixemos que para pedir e para dar as grazas. Quizais porque en vida nunca lle demos as grazas a Luis pola súa constancia, pola súa presencia, pola súa dedicación… E neste momento en que todo parece rematar para Luis, pero en realidade todo comeza, cantamos tendo partido o corazón, pero tendo moi presentes os moitos anos nos que Luis nos aportou a voz e a bonhomía, facéndonos saber que cando cantamos non é a voz o máis importante, senón a alma. 

Cantando, xuntámonos á súa familia –a súa muller, as súas fillas e xenro, o seu neto, seu irmán… e dicísmoslle adeus – en realidade, ata sempre- a Luis, o compañeiro da voz, do corazón, e da alma!.

(Oración por LUIS VÁZQUEZ MUÑIZ o 17 de abril de 2017 na Igrexa de San Francisco Xavier-Lugo. Xulio Xiz é Presidente do Orfeón Lucense)

Publicado o 05. 05. 2017 en Galicia Digital

Hoxe, na Nova

Lido onte, xoves, por Onda Cero

  

Hoxe vou contar unha pequena historia, que ten relación con Lugo e os lucenses, dun xeito espiritual, entrañable, humano.

         Houbo unha lucense, Marta Blanco Rubio, que viviu en Lugo moitos anos, e en 1985 foi vivir a Don Benito, en Badajoz. No 1995, entrou a formar parte da Agrupacion Coral don Benito, pola súa querencia pola música, e foi compoñente desta agrupación ata a súa morte o pasado 15 de decembro.

         Marta tíñalles falado tanto aos seus compañeiros da Coral da cidade de Lugo, que os componentes desta Agrupación quixeron vir cantar a Lugo en homenaxe á compañeira desaparecida, e para traer á nosa cidade unha mensaxe de amizade musical e de relación humana da que Marta fixo gala durante toda a súa vida.

         Marta era filla da Carlos Blanco Martinez de Velasco, que foi fundador do Rocho Musical que durante moitos anos funcionou no Círculo das Artes, así como tamén promotor da Filarmónica Lucense. Xa de pequena, actuou en Lugo co Rocho musical. E logo foi durante vinteun anos embaixadora lucense en Don Benito, formando parte da súa Agrupación Coral. Morreu aos 77 anos; e 25 días despois morreu o seu home, José Miguel Plantón Meilán,  tamén lucense, e que tamén formaba parte do Rocho musical.

         Para esta homenaxe na nosa cidade, o Coro de Don Benito púxose en contacto co Orfeón Lucense, para que o acompañase como anfitrión nunha actuación que o conxunto lucense lle está organizando para este sábado, ás 8,30 do serán, na igrexa de A Nova. A esta homenaxe musical acudirán familiares de Marta Blanco, que viven en Lugo e na Coruña, e poden facelo tamén todos os lucenses que o desexen. E para rematar a súa estadía en Lugo, a Agrupación Coral de Don Benito, o domingo, cantará a misa da unha da tarde na Catedral lucense.

         Esta é a historia: Desde don Benito en Badajoz, a súa coral, ven a Lugo, esta fin de semana, para –en homenaxe póstuma- cantar na honra dunha lucense– Marta Blanco Rubio- que, ademáis de compañeira, fíxose amiga, e contaxiolles o seu amor, a súa devoción, pola sua cidade de Lugo, e queren transmitirnos aos lucenses a mensaxe fraterna, musical e humana que a nosa veciña lles deixou.

                                                        (Xulio Xiz, Presidente do Orfeón Lucense)

Enlace ao artigo en Galiciadigital, aquí

Programa

Concerto da AGRUPACIÓN CORAL DE DON BENITO (Badajoz) e o

ORFEÓN LUCENSE. Igrexa de A Nova (Lugo). Sábado, 29-4-2017

a partir das 20,30 h.

 ORFEÓN LUCENSE

 GABRIEL´S OBOE Ennio Morricone (Arr. Paulo Rowlands)
 HALLELUJAH Leonard Cohen (Arr. Roger Emerson)
 LA FLOR E. M. Torner
 Ó RAMA Popular portuguesa (Arr.Adelino Martins)
 COMPAÑEIRA Tradicional (Arr. Julio Domínguez)

 AGRUPACIÓN CORAL DE DON BENITO

 ENSALADA MADRILEÑA P. Sorozabal
 AL SHLOSHA D´VARIM Allan E. Naplan
 AVE MARÍA William Gómez
 MAMMA MÍA Abba
 TRES NANAS CÁNTABRAS Javier Busto
 POH HAPPY DAY Spiritual negro
 SING! (¡CANTAR!) Jay althouse
 EL REDOBLE Trad. Extremadura

Cantamos coa Coral de Don Benito

O Orfeón Lucense será o próximo sábado, día 29, anfitrión da Coral de Don Benito (Badajoz), e xuntas ofrecerán un concerto ás oito e media do serán, na igrexa lucense de A Nova.

         A Agrupación Coral de Don Benito tivo entre os seus componentes á lucense Marta Blanco, e despois do pasamento desta, a agrupación quixo render homenaxe á súa memoria vindo cantar á capital lucense, poñéndose en contacto co Orfeón Lucense para que colaborase nesta iniciativa.

         En homenaxe, pois, á falecida Marta Blanco, as dúas agrupacións ofrecerán un concerto de música coral na igrexa de A Nova, con entrada libre, ao que asistirán familiares da homenaxeada, residentes en Lugo e A Coruña.

         Despois deste concerto, e para culminar a súa actuación na capital lucense, a Agrupación Coral de Don Benito cantará a misa da unha da tarde do domingo, día trinta, na Catedral lucense.

(Nota remitida aos medios)

Adeus

Estamos conmovidos e moi impresionados.

O noso compañeiro Luis Vázquez Muñiz, membro do Orfeón Lucense desde hai máis de 25 anos, faleceu este Venres Santo, no transcurso dunha enfermidade que non deu superado.

Aínda así, o Orfeón cantou onte a Paixón, vai cantar hoxe a Vixilia Pascual, e cantará mañá a Misa de Pascua, porque a vida segue e Luis así o querería.

O funeral será o luns, 17 de abril, ás 5 da tarde na parroquial de San Francisco Xavier.

Desde aquí enviamos á súa esposa, Pilar, e ás súas fillas todo o noso cariño.

Ata sempre, Luis.