luns, 30 de xaneiro de 2023

Vodas de Ouro en Castelo

 Unha voda sempre é motivo de celebración, canto máis se falamos das vodas de ouro. Este último sábado de xaneiro tivemos a honra de ir cantar por esta circunstancia para Marina, Víctor e os seus convidados á igrexa parroquial de Castelo (Outeiro de Rei).

 Nunha mañá fría, de ceo luminoso, chegamos á fermosa  igrexa, un templo pequeno e acolledor, con tempo suficiente para ver a maneira de acomodarnos no seu coro e facer as probas de son pertinentes.

 Á hora acordada chegaron os noivos e acompañantes e deu comezo a cerimonia que estivo colmada de momentos emotivos e graciosos, especialmente nos parlamentos do oficiante e dos contraíntes.

  O repertorio elixido por Marcos Fernández Mosquera para este acto foi o seguinte:

  - Ven, Señor, ás nosas almas. L. de Olano.

  - Señor ten piedad. Misa Alrededor de tu Mesa. F. Palazón.

  - Aleluia dit irlandais. J. P. Lécot.

  - Deus do universo. L. de Olano.

  - Santo. Misa Pascual. X. Castiñeira.

  - Cordero de Dios. Misa Alrededor de tu Mesa. F. Palazón.

  - Pescador de hombres. B. Corona.

  - Cantico dell' Agnello. M. Frisina.


  Unha vez finalizada a emotiva cerimonia, os compoñentes do Orfeón achegámonos a Uriz para degustar un xantar de confraternidade.

  Máis abaixo acompañamos dúas instantáneas deste día en Castelo.







  

  

mércores, 18 de xaneiro de 2023

"Xesús Mato. 90 anos... e 50 do seu Fuxan os Ventos"

  Baixo a coordinación de Antonio Giz e Xulio Xiz, Brandán Comunicación S. L. publica Xesús Mato. 90 anos... e 50 do seu Fuxan os Ventos, un libro que recolle as lembranzas máis queridas e entrañables de persoas que acompañaron de preto a Xesús Mato na súa traxectoria vital.

   Non é abondo a extensión deste post para glosar os 90 anos deste crego, grande de corazón, xeneroso e todo bondade que deixou a súa pegada de luz e bonhomía  por todos e cada un dos lugares que tiveron a sorte de desfrutar da súa presenza.
   
  Un tras outro van facendo as súas aportacións Román Rodríguez, Conselleiro de Cultura, Educación, Formación Profesional e Universidades da Xunta de Galicia; Xesús Mato, alcalde de Paradela; Eloy Rodríguez, exalcalde de Portomarín; Ángel Fernández López, Fillo predilecto de Paradela; Arximiro López Rivas, compañeiro; Valentín García Gómez, Secretario Xeral de Política Lingüística; José Crespo Iglesias, alcalde de Lalín; Alfonso Blanco Torrado, Presidente de Xermolos e da Irmandade Manuel María da Terra Chá; Xosé Luís Rivas Cruz, Mini; Baldomero Iglesias Dobarrio, Mero; Santiago Rodríguez López, profesor da Universidade de Bristol e fillo do escritor e Fillo Predilecto de Paradela Manuel Rodríguez López; Marisol Bravos López, expresidenta de Auxilia; Rosa Tourón, artesá cesteira; Isidoro Rodríguez Pérez; Marcos M. Fernández Mosquera, director do Orfeón Lucense; Manuel Lombao Lombao, xornalista; Xulio Xiz, vello compañeiro; Antonio Giz, director de Galicia Digital e Carlos Rodríguez Otero, músico e musicólogo. 

  Todos eles van desgranando méritos, feitos relevantes ou anécdotas e curiosidades ilustradas con múltiples imaxes que xa forman parte da cultura, da historia de Galicia e da memoria dos que xa temos algúns anos.

  O Orfeón Lucense, que se precia de haber tido a D. Xesús como director nun momento crucial para a súa continuidade, non podía faltar á presentación do libro Xesús Mato. 90 anos... e 50 do seu Fuxan os Ventos na Biblioteca Nodal de Lugo.

  Trala apertura do acto a cargo da Directora da Biblioteca, María Isabel Pérez Fórneas, interviron neste orde Xulio Xiz, Ángel López Rodríguez, Marcos Fernández Mosquera, Marisol Bravos López, Isidoro Rodríguez López, Valentín García Gómez e Xesús Mato; quen, visiblemente emocionado, agradeceu a todos  a participación nesta homenaxe ao tempo que restaba importancia ao traballo realizado por el mesmo.

   Xosé Luís Rivas Cruz, Mini, rematou cun relato da historia de Fuxan os Ventos desde as súas orixes que emocionou a todos os presentes, para finalizar entoou a capela un fragmento da canción Fuxan os Ventos, harmonizada por Xesús Mato e coa que o grupo musical gañou o certame de As San Lucas en 1972.

   Ao longo de todo o acto fóronse engadindo con cada participación múltiples pinceladas de humor e simpatía, tan propias do protagonista do libro, que o fixeron divertido e, por descontado, emotivo.

  Só pedimos moita saúde e felicidade para este home bo e grande polos seus feitos e que siga guiándonos coa súa luz.

   A continuación inserimos imaxes da homenaxe:







  



Foto tomada de Xosé Luís Rivas Cruz, Mini

Foto tomada do Facebook 
de Xosé Luís Rivas Cruz, Mini.

martes, 3 de xaneiro de 2023

Concerto de Nadal 2022 (IV)

   James Pierpont, compositor, arreglista e organista estadounidense, compuxo polo 1850 unha peza baixo o título The one horse open sleigh que trata da alegría que proporciona o paseo nun carro tirado por un cabalo.

   Esta composición de estrutura clásica na súa harmonía publicouse no 1857 en Boston como canción de inverno pero foi reimpresa no 1859 co título de Jingle bells e descoñécese quen lle cambiou o texto para que se convertise nunha das melodías de Nadal máis coñecidas en todo o mundo.

   O Orfeón quixo volver ás orixes desta melodía e interpretou a súa primeira  partitura da que enlazamos o audio a continuación:

    Solista: Javier Pérez-Schofield.

    Percusión: Guadalupe Enríquez Parga


luns, 2 de xaneiro de 2023

Concerto de Nadal 2022 (III)

   Francisco Guerrero é xunto con Tomás Luís de Victoria e Cristobal de Morales un dos compositores senlleiros do Renacemento español cuxa extensa obra relixiosa e profana tivo proxección en Europa e nos países pertencentes á coroa española da época.

  Deste autor é Niño Dios d'amor herido, fermosísima peza a catro voces pertencente á colección Canciones y villanescas espirituales que un cuarteto de cantores do Orfeón ofreceu de maneira especialmente harmónica e equilibrada neste concerto de Nadal.

   A continuación inserimos o audio:

    Intérpretes:

       Sara Pérez Cruz, soprano.

       Beatriz Enríquez Parga, contralto.

       Carlos Rodríguez Otero, tenor.

       Marcos Fernández Mosquera, baixo.

   

domingo, 1 de xaneiro de 2023

Concerto de Nadal 2022 (II)

   Adicaremos unha mirada máis detida ás pezas con solistas do Concerto de Nadal.

  A primeira delas é Gaudete, vilancico anónimo en latín do s. XVI, cuxo retrouso anima a aledarnos polo nacemento do Neno Xesús.

  Pertence ás Piae Cantiones, colección de cantos en latín medieval publicados en 1582, difundidos polas igrexas reformadas de Suecia e Finlandia e cantados nas súas escolas desde o S. XVIII ata a actualidade. De Suecia foron levados ao Reino Unido polo embaixador inglés desde onde foron editados e difundidos aos demais países.

  Foi unha elección moi interesante a interpretar polo Orfeón tanto pola mensaxe que contén como polo ritmo medieval, irregular e dinámico que aporta ao noso repertorio.

   Tras unha introdución inicial do retrouso entonada por Carlos Rodríguez Otero, repítese polo coro acompañado de percusión que no sucesivo se alterna coas estrofas interpretadas ad libitum polos solistas Carlos Rodríguez, Carlos Sánchez, Guadalupe Enríquez e Silvia Nadela.

   Enlazamos o documento sonoro a continuación: