Faltan dous días

   O luns, 27 de maio, teremos o privilexio de participar no concerto inaugural do X Festival Internacional de Música de Órgano do Corpus Christi que se vai celebrar na nosa cidade.

 Neste primeiro concerto actuará o organista  Eugenio Maria Fagiani interpretando pezas selectas dos séculos XVII  ao XX e O Orfeón Lucense ofrecerá un fermoso repertorio de música sacra de compositores que van do século XIX ao XXI, tal como se pode ver nas imaxes que se acompañan.

 Organista e coro actuarán individualmente e de forma conxunta, alternándose para dar un recital ameno e variado que seguro resultará atractivo para calquera amante da boa música. 

 Neste enlace pode verse o programa completo do Festival e nas imaxes seguintes o do primeiro concerto.

  Agardamos a vosa presenza!!

   

Misa e concerto en O Corpiño

    Con motivo do Ano Santo Mariano fomos invitados polo parroco, D. José Criado, a cantar no Santuario de Nosa Señora do Corpiño, perto de Lalín. O Orfeón aceptou con agrado e este sábado, día 11 de maio, viaxamos alí.

   A misa foi oficiada polo párroco do Santuario e o Orfeón, dirixido por Marcos Fernández Mosquera e acompañado ao órgano por D. Luís Varela Castiñeira, Prefecto de Música da Catedral de Lugo, interpretou as pezas seguintes:

   - Hija del pueblo. A. Taulé.

   - Kyrie en Re Majeur. J. P. Lécot.

   - Aleluia. I. G. Ramos.

   - Ave verum. J. P. Lécot.

   - Sanctus. Misa de Lourdes. J. P. Lécot.

   - Agnus Dei. Messe Peuples de la Terre. J.P. Lécot.

   - Ave Maria. T. L. de Victoria.

   Finalizada a misa o Orfeón ofreceu aos asistentes un pequeno concerto constituído por pezas relixiosas e profanas.

   D. José Criado agradeceu a presenza da nosa agrupación e explicou aos presentes a historia e a lenda do Santuario do Corpiño. A continuación entregoulle ao noso director un agasallo para a agrupación e a cada un dos compoñentes do coro unha pulseira conmemorativa do Ano Santo Mariano.

   De volta para Lugo paramos en Lalín para celebrar un xantar de confraternidade ao que asistiu tamén D. José Criado.

                                   Santuario de Nosa Señora do Corpiño