domingo, 21 de agosto de 2022

O Orfeón busca novas voces

 O Orfeón Lucense prepárase para comezar un novo curso. Os obxectivos que nos propoñemos acadar este ano requiren recursos humanos en número e diversidade suficientes. Precisamos cantores masculinos principalmente, aínda que as voces  femininas serán benvidas.

 Se che gusta a boa música coral traballada con rigor á vez que de forma amena, ven presenciar un ensaio calquera martes despois do día 6 de setembro ás 19:30 no local parroquial de San Froilán e, se che gusta, fai unha sinxela proba de canto para poder pertencer ao noso colectivo.

 Anímate¡!!Seguro que será unha experiencia positiva e gratificante.

 A continuación enlazamos o anuncio publicado en El Progreso para tal fin.




martes, 16 de agosto de 2022

Misa de Nosa Señora

  Presidida polo prelado da diócese, monseñor Carrasco Rouco, e coa asistencia de distintas autoridades e numerosos fieis celebrouse a misa solemne de Nosa Señora dos Ollos Grandes, padroa da cidade de Lugo.

  O Orfeón Lucense dirixido por Marcos Fernández Mosquera, fiel á súa cita, puxo música á solemnidade acompañado por Xavier de Acosta ao órgano.

  O repertorio interpretado foi o seguinte:

   - Himno a la Virgen de los Ojos Grandes. J. Ortiz Peña.

   - Kyrie en Re Majeur. J. P. Lécot.

   - Gloria de Lourdes. J. P. Lécot.

   - Aleluya.I. García Ramos.

   - Ave María. T. L. de Victoria.

   - Sanctus de Lourdes. J. P. Lécot.

   - Agnus Dei. Messe Peuples de la terre. J. P. Lécot.

   - Hija del pueblo. A. Taulé.

   - O salutaris hostia. P. de la Rue.

   - Salve Regina. Gregoriano.

   

   Rematada a cerimonia, celebrantes, asistentes e Orfeón trasladámonos ao camarín da Virxe dos Ollos Grandes onde unha concelleira presentou unha ofrenda floral á padroa mentras o coro interpretou a cantiga nº 72 de Afonso X O Sabio, Da que Deus mamou, na que se narra o milagre da curación dunha muller tolleita atribuído á Virxe e acontecido en Lugo.

   Na imaxe, un momento da actuación do Orfeón Lucense.




domingo, 17 de xullo de 2022

Misa da Nosa Señora do Carme

  Onte, 16 de xullo, celebrouse na capela do Carme a misa na honra da súa padroa e o Orfeón foi invitado a amenizar musicalmente este solemne acto.

   O repertorio interpretado foi o seguinte:

   - A Vós, Reina venimos. Fr. José J. de la Natividad, C.D.

   - Kyrie en Re Majeur. J. P. Lécot.

   - Gloria de Lourdes. J. P. Lécot.

   - Alleluia (Cántico dell'Agnello). M. Frisina.

   - Deus do Universo. L. Olano.

   - Santo. Misa Alrededor de tu Mesa. F. Palazón.

   - Cordero de Dios. Misa Alrededor de tu Mesa. F. Palazón.

   - O Pan do Ceo. X. Portas Ferro.

   Despois da celebración iniciouse unha procesión até a catedral seguida por numeroso público e alí o Orfeón despediu a celebración cantando o Himno a la Virgen del Carmen.

   Na imaxe dous momentos previos ó inicio da solemnidade.

     



domingo, 10 de xullo de 2022

IV. Noite Coral. As voces da Cidade

 Recuperamos o formato da Noite Coral, sen restricións, tal como foi concebido antes da pandemia e nunha noite espléndida, mesmo impropia destas latitudes, iniciamos a serie de concertos que compoñen este circuito artístico e espiritual polos templos da cidade e o Círculo das Artes.

  Orfeón Lucense, Sólo Voces, Coro do Hospital e Gruppo vocale San Bernardo interpretaron concertos sucesivos en San Pedro, San Froilán, A Nova e Círculo das Artes, respectivamente, dando tempo aos seus seareiros a trasladarse dun lugar ao outro.

   O repertorio interpretado polo Orfeón foi o seguinte:

   - O salutaris ostia. Pierre de la Rue.

   - Cristo al morir tendea. Fra Marc'Antonio da San Germano.

   - Gabriel, el Ángel. Trad. vasca. Harm. E. Pettman. Trad. Carlos Rodríguez.

   - Adoramus te, Christe. Theodore Dubois.

   - Virgo Gloriosa. Johan August Söderman.

   - Cantico dell'Agnello. Marco Frisina.


   Tras os concertos de cada agrupación, ás corais anteriores uníronse o Quartetto di Brescia aos trombóns e Nicolás Varela ao órgano, e todos dirixidos por Giulio Mercati interpretamos tres pezas de polifonía renacentista a 12 voces no altar do Bo Xesús da Catedral:


   - Sapientiam omnium. Jacob Handl.

   - Super flumina Babylonis. Luca Marenzio.

   - Tota pulchra es, amica mea. Hieronymus Praetorius.


  Foi unha experiencia intensa e emocionante que compensou todo o traballo e esforzo que supón a preparación dun evento destas características con persoas que, nalgúns casos, vivimos a miles de kilómetros de distancia.

   Durante unhas horas a cidade encheuse de harmonías diversas e marabillosas que os afeccionados á música sacra coral e os intervintes no acto puidemos desfrutar, ao tempo que un percorrido polo casco histórico nun solpor fermosísimo de verán completou unha xornada de música e convivencia cuxos ecos perdurarán nos nosos ouvidos por moito tempo.

   Na imaxe dous momentos da Noite Coral: Concerto do Orfeón e concerto final.







luns, 4 de xullo de 2022

Preparando a IV NOITE CORAL

 Despois dun tempo de ensaios en cada coro intervinte neste evento por separado, chegamos á fase de probar como artellamos as diferentes pezas deste complicado puzle que é un concerto a doce voces mixtas.

 Esperámosvos o sábado, día 9. Será un magnífico paseo sonoro polas igrexas do casco histórico, o Círculo das Artes e a Catedral. O programa completo pode verse neste enlace e promete un desfrute intenso para calquera amante da boa música coral. 

 Nas imaxes, momentos previos ao inicio do ensaio conxunto do Coro do Hospital, Sólo Voces e Orfeón Lucense na parroquia do Bo Pastor.





   

domingo, 26 de xuño de 2022

Ofrenda do Antigo Reino de Galicia ao Santísimo. 2022

  Celebramos este ano o 350 aniversario da Ofrenda do Antigo Reino de Galicia ao Santísimo Sacramento. Dita ofrenda tén orixe na axuda que a Catedral de Lugo solicitou en 1618 ao rei Felipe III para realzar a adoración ao Santísimo exposto en dita sé.

 O formato actual deste acto arranca en 1925, ano no que se decidiu que un representante de cada unha das sete cidades do Antigo Reino de Galicia fose quen presentase a ofrenda cada ano.

 Nesta ocasión a oferente foi a cidade irmá de Santiago de Compostela representada polo seu alcalde José Sánchez Bugallo a quen respostou o arcebispo de dita cidade Julián Barrio Barrio, que ademais presidiu a liturxia.

  Estiveron presentes o cabildo catedralicio, os bispos de Galicia e Astorga, diferentes autoridades civís e militares e numerosos fieis.

  O Orfeón Lucense, dirixido por Marcos Fernández Mosquera e Silvia Nadela Villarino en Ubi caritas, acompañou cos seus cantos a cerimonia interpretando o seguinte repertorio:

    - Con ledicia vimos. A. Fdez León.

    - Señor ten piedade. Misa Galega. X. Castiñeira.

    - Gloria. Misa Galega. X. Castiñeira.

    - Salmo: O Señor é o meu pastor.

    - Alleluia dit Irlandais. F. O' Caroll e L. Deiss.

    - Ubi Caritas. O. Gjeilo.

    - Santo. Misa Galega. X. Castiñeira.

    - Año de Deus. Misa Galega. X. Castiñeira.

    - Eucaristía. Taizé - Fdez. León.

    - Ave verum. W. A. Mozart.

  Eis o vídeo da celebración, por xentileza da canle de Youtube da Diócese de Lugo:  

 


sábado, 25 de xuño de 2022

Vésperas da Ofrenda ao Santísimo. 2022

  O Orfeón acompañou, como xa vén sendo costume, as solemnes Vésperas que se celebran o día anterior á Ofrenda do Antigo Reino de Galicia ao Santísimo.

 Dirixido por Marcos Fernández Mosquera, interpretamos o repertorio seguinte:

   - Vésperas solemnes.

   - Ave verum. W. A. Mozart.

   - Kyrie en Re M. J. P. Lécot.

   - Gloria de Lourdes. J. P. Lécot.

   - Aleluia. I. García Ramos.

   - Santo. Misa Alrededor de tu Mesa. F. Palazón.

   - Cordero de Dios. Misa Alrededor de tu Mesa. F. Palazón.

   - O pan do ceo. X. Portas Ferro e I. García Ramos.

   - Eu creo en Ti, Señor. L. Mason.

   - Cantemos al Amor. I. B. de Sagastizábal.






domingo, 19 de xuño de 2022

Corpus Christi 2022

  Con ameaza de treboada na Praza de Santa María, a Banda Filarmónica, o Coro do Hospital e o Orfeón Lucense, colocámonos na entrada norte da Catedral ao abrigo do pórtico para protexernos das probables chuvieiras que puideran caer. Presididos  polo espléndido pantocrator, agardamos o inicio da liturxia do día.

 A cerimonia do Corpus Christi estivo rexida por Monseñor Carrasco Rouco, contou coa asistencia das autoridades e de numerosos fieis.

 A agrupación de música tradicional Os Xílgaros e unha agrupación de vento tamén formaron parte activa no acompañamento musical do acto.

 A Banda Filarmónica e as dúas corais estiveron dirixidas por Iván Martínez Sabio coa intervención de Marcos Fernández Mosquera nalgunhas pezas e o acompañamento de D. Luís Varela Castiñeira ao órgano.  Os intervintes na parte musical tivemos a honra de estrear unha Misa Solemne escrita por D. Xosé Castiñeira e harmonizada para banda por Uxío Domínguez Darriba, sobriño neto do compositor.

 Ademais das pezas instrumentais as agrupacións ofreceron o seguinte repertorio vocal:

   - Hoy proclamamos firmemente. L. Burgeoise.
   - Señor ten piedad. Misa Solemne. X. Castiñeira.
   - Gloria. Misa Solemne. X. Castiñeira.
   - Salmo: Tú eres sacerdote eterno.
   - Alléluia dit Irlandais. F. O'Caroll e L. Deiss
   - Santo. Misa Solemne. X. Castiñeira.
   - Cordero de Dios. Misa Solemne. X. Castiñeira.
   - Pescador de hombres. C. Gabaráin. Harm.: B. Corona.
   - Jesus bleivet meine feude. J. S. Bach.

   Nas imaxes, dous momentos da celebración:






martes, 14 de xuño de 2022

Concerto dentro do Festival de Órgano

  Por primeira vez o Orfeón Lucense foi convidado por Giulio Mercati a participar no Festival Internacional de Órgano do Corpus Christi. Tivemos a honra de ser acompañados por Misty Schaffert, organista de talla internacional que soubo realzar coa súa sutileza e bo facer as nosas interpretacións.

 O numeroso público congregado na catedral puido desfrutar dun magnífico e variado repertorio para órgano desde o século XVII ata a actualidade e dunha selección de pezas para coro e órgano e coro a capella desde o século XV ata os nosos días.

 Desde o primeiro momento a empatía entre a organista e o coro deu como resultado unha experiencia única, emocionante e enriquecedora que ninguén de nós esquecerá.

  O Orfeón Lucense estivo dirixido por Marcos Fernández Mosquera, a excepción da última composición na que o fixo Silvia Nadela Villarino, actuando como solista na segunda peza Sara Pérez Cruz. O programa completo pode verse neste enlace.

  Eis unha imaxe do concerto. Premendo nela pode escoitarse o audio dunha das pezas interpretadas polo Orfeón: Geistliches lied (Johanes Brahms).




                                 Fonte: Catedral





   


martes, 7 de xuño de 2022

Concertos no Camiño

   Con motivo do Ano Santo Compostelán a Diócese de Lugo organiza cinco ciclos de música sacra co fin de salientar a beleza arquitectónica, notable en si mesma, dos templos máis senlleiros da peregrinación na diócese, engadíndolle a espiritualidade e o potencial artístico da música.

  Neste programa detállanse todos os concertos que compoñen os cinco ciclos organizados:

    - Festival Internacional de Música de órgano do Corpus Christi.

    - Música no Camiño Primitivo.

    - Viae lucensis.

    - Noite coral lucense.

    - Ó son de Santa María.

   Ditos ciclos forman parte da iniciativa internacional A Música do Peregrino, unha rede de dez festivais que, ademais dos cinco xa citados, celébranse en Suiza e Italia, baixo a mesma dirección artística de Giulio Mercati e coa idea común do Camiño.

  Esta é unha magnífica forma de potenciar o Camiño, a Música Sacra, a Arquitectura e a espiritualidade ligadas a el. Iniciativa que hai que agradecer á Diócese de Lugo personificada no seu prelado, monseñor Carrasco Rouco, quen sempre mostrou unha grande sensibilidade respecto da Música e agradecemento a quen a interpreta. No caso do Orfeón Lucense faise isto patente expresando o seu afecto e admiración en cada unha das nosas actuacións, tanto en concertos como acompañando os oficios relixiosas.

    Asimesmo, vaia a nosa gratitude para o coengo Prefecto de Música da Catedral, D. Luís Varela Castiñeira, polo seu labor como promotor da música coral na nosa cidade así como para Giulio Mercati, director artístico destes ciclos de concertos e responsable dos eventos musicais da Diócese de Lugo por reunir aquí a figuras senlleiras internacionais que doutra maneira non teríamos ocasión de escoitar en directo.



                                                    Giulio Mercati

                                          Foto tomada de La Voz de Galicia


mércores, 18 de maio de 2022

Letras Galegas 2022

  Despois do parón cultural provocado pola pandemia, reanudamos, por fin, un dos actos senlleiros da nosa literatura. No eido da música, cunha xuntanza de todos os coros de Lugo na Praza Maior para honrar as Letras Galegas cantando fermosas pezas na nosa lingua.

 Cada unha das agrupacións corais interpretou dúas pezas no temprete e para finalizar todos xuntos cantamos outras dúas composicións nas escaleiras do fondo da Praza, tal como figura no programa do acto.

 Foi unha estupenda tarde de confraternización na que cantores e asistentes desfrutamos ata o final da música coral en galego. 

 Eventos así deben repetirse con este motivo e con outros porque fomentan a boa relación que xa existe entre as distintas agrupacións á vez que contribúen a que sintamos e respiremos conxuntamente  a Música todos os que somos amantes dela.

 As dúas pezas interpretadas polo Orfeón Lucense foron dirixidas por Marcos Manuel Fernández Mosquera e Silvia Nadela Villarino, respectivamente:

     - Canto de berce para unha princesa negra. A. R. Sabanés.

     - Ao pasar por Camariñas. Trad. galega. Arr.: Julio Domínguez.


  Na imaxe un momento da actuación conxunta de todos os coros no fondo da Praza Maior:



xoves, 21 de abril de 2022

Música para salvar vidas

   Por invitación do Mestre de Capela da Catedral, D. Luis Varela Castiñeira, o Orfeón foi invitado a cantar no concerto de góspel africano que o grupo Aba Taano ofreceu na sé a beneficio dos nenos e xoves máis desfavorecidos de Uganda.

  Esta actividade é unha iniciativa da ONG Música para salvar vidas, fundada por varios cidadáns españois para dar formación a infantes e adolescentes ugandeses protexéndoos ata que son capaces de valerse por si mesmos.

 Foi unha experiencia marabillosa e diferente na que poidemos desfrutar de polifonías africanas, tan cheas de enerxía, espontaneidade e sonoridade, e dalgunhas melodías de espectáculos musicais e cinematográficos interpretados polo grupo visitante.

  O Orfeón Lucense actuou en primeiro lugar co seguinte repertorio:
   
  - Más cerca, oh Dios! de Ti. L. Mason.

  - Gabriel's oboe. E. Morricone.

  - Canto de berce para unha princesa negra. A. R. Sabanés.

  - Swing low. W. Willis. Arr. Josli.

  - O rama. Popular do Baixo Alentejo.
 



                                                                           Aba Taano            

                                     


                                                                  Ensaio do Orfeón Lucense


domingo, 17 de abril de 2022

Domingo de Pascua 2022

   Poñemos fin á Semana Santa coa celebración da Pascua. Coa alegría propia desta data o Orfeón acompañou cos seus cantos a misa presidida polo prelado D. Alfonso Carrasco Rouco, baixo a dirección de Marcos Fernández Mosquera e actuando como organista o coengo Prefecto de Música da Catedral, D. Luis Varela Castiñeira.

   O repertorio foi o seguinte:

  - Cantemos al Amor de los Amores. I. B. De Sagastizábal.
  - Gloria de Lourdes. J. P. Lécot.
  - Aleluya. I. G. Ramos.
  - Santo. Misa Pascual. J. Castiñeira.
  - Cordero de Dios. Misa Pascual. J. Castiñeira.
  - Jesu, Rex admirabilis. G. P. da Palestrina.
  - Reina del Cielo. J. Castiñeira.






Sábado Santo 2022

  Despois da posta do sol, como está ordeado, comezou a celebración da Vixilia Pascual coa beizón do lume no adro da Catedral e tamén a da auga.

  Ademais de acompañar os cantos propios da liturxia do día, o Orfeón interpretou o seguinte repertorio:

   - Gloria. Misa Alrededor de tu Mesa. F. Palazón.

   - Aleluya de los irlandeses. J. P. Lécot.

   - Santo. Misa Alrededor de tu Mesa. F. Palazón.

   - Cordero de Dios. Misa Alrededor de tu Mesa. F. Palazón.

   - O pan do ceo. X. Portas Ferro.

   - O salutaris. P. de la Rue.


   Na imaxe un momento previo á beizón do lume no adro da Catedral.






   

         

   

   

   

   

venres, 15 de abril de 2022

Venres Santo 2022

   Este Venres Santo tivo a particularidade para a nosa agrupación de ter que cantar con poucos compoñentes por estaren varios cantores contaxiados de covid.

  Abordamos o noso cometido coa maior adicación, como sempre, e coa dirección habitual interpretamos o seguinte repertorio sen acompañamento de órgano, dada a solemnidade do día.

   - Padre, a tus manos. Salmo.

   - Pasión según S. Juan. J. Castiñeira.

   - Victoria, tú reinarás. A. Losay.

   - Crux fidelis. Gregoriano.

   - Comiendo del mismo pan. J. Madurga.

   - Adoramus te, Christe. T. Dubois.







xoves, 14 de abril de 2022

Xoves Santo 2022

   Comezan os días centrais da Semana Santa coa celebración do Xoves Santo. Unha liturxia presidida polo prelado da diócese, Monseñor Carrasco Rouco, e concelebrada con varios membros da curia, entre eles o Mestre de Capela da Catedral, D. Luís Varela Castiñeira.

   O Orfeón Lucense dirixido por Marcos Fernández Mosquera e acompañado por Xavier de Acosta ao órgano interpretou o seguinte repertorio:

   - Cristo ayer, Cristo hoy. J. P. Lécot.

   - Kyrie en Re M. J. P. Lécot.

   - Gloria de Lourdes. J. P. Lécot.

   - El cáliz que bendecimos. Salmo.

   - Interleccional. J. Castiñeira.

   - Jesús, el Señor. J. Castiñeira.

   - Un mandamiento nuevo. A. Alcalde.

   - Ubi caritas et amor. Gregoriano.

   - Sanctus. M. Manzano.

   - Cordero de Dios. A. Taulé.

   - Eucaristía. A. Fdez. León/Taizé.

   - Ave Verum. W. A. Mozart.

   - Pange lingua. Gregoriano.

   - Alabado sea el Santísimo. Popular.


Na imaxe o momento da saída da procesión.




martes, 12 de abril de 2022

Momentos

  Esperando o inicio dunha actuación xorden tempos  para compartir dúbidas, satisfacer inquietudes ou buscar a relaxación e concentración.

   Son momentos importantes para o grupo e para os cantores e músicos polo que teñen de persoal e mesmo íntimo.

   As imaxes mostran tres deses momentos antes da Misa de Ramos.










luns, 11 de abril de 2022

Misa de Domingo de Ramos

   Tras a bendición dos ramos e a procesión, que volveu ás rúas despois dos anos peores da pandemia, comezou a Misa de Ramos. 

  Oficiada polo prelado da diócese, Monseñor Carrasco Rouco e concelebrada con varios coengos, actuando como organista Xavier de Acosta e coa dirección coral de Marcos Fernández Mosquera, celebrouse esta solemnidade na que o Orfeón Lucense interpretou o seguinte repertorio:

   - Salmo: Dios mío, Dios mío.

   - Cristo por nosotros. F. Palazón.

   - Santo. T. Aragües.

   - Agnus Dei. Misa Peuples de la Terre. J. P. Lécott.

   - Yo soy el Pan de Vida. S. Toolan.

   - Hágase tu voluntad. I. Yepes.





venres, 8 de abril de 2022

Pregón de Semana Santa 2022

  Despois do descanso obrigado pola pandemia a cidade pretende retomar na medida do posible o ritmo de vida habitual. Así a Semana Santa, como viña sendo costume, iníciase co Pregón no Círculo das Artes, este ano a cargo de Ramón Basanta, Presidente da Xunta de Cofradías.

    O Orfeón foi invitado a actuar para abrir o acto e, dirixido por Marcos Fernández Mosquera, interpretou para os asistentes o seguinte repertorio:

    - Christus factus est. M. Villanueva.

    - Cristo al morir tendea. Marc' Antonio da San Germano.

    - Jesus bleivet meine freude. J. S. Bach.

    - Ave verum corpus. W. A. Mozart.

    - Adoramus te, Christe. T. Dubois.


    Enlazamos a continuación unha imaxe do concerto



luns, 28 de marzo de 2022

Coros pola Paz

 Coros por la Paz é unha iniciativa que naceu coa pretensión de unir a través da Música a persoas de toda Europa no desexo de que termine a guerra de Ucraína e todas as demais guerras que existen no mundo. 

  A idea era que o sábado 27 de marzo ás 12:00 toda Europa entoase o canon de Mozart Dona Nobis Pacem.

  Os coros de Lugo non podían faltar e entre eles o Orfeón Lucense. Todos reunidos na Praza de Santa María á hora convida, dirixidos por Pablo Rico Echegaray, cantamos coa voz e o corazón nun acto de gran respecto e emoción para facer realidade o desexo de PAZ.

 Enlazamos o vídeo do momento.


domingo, 20 de marzo de 2022

Misa de San Xosé

   Despois dunha paréntese merecida tras un Nadal intenso, retomamos os ensaios para as actuacións deste ano 2022.

   O primeiro acto foi o pasado sábado na Catedral, a Misa de San Xosé. 

   Con escasa asistencia de fieis cantamos unha misa que resultou grata e canora, coa particularidade de que estreamos unha peza que nos facía especial ilusión, O salutaris de Pierre de la Rue.

   Outra novidade foi o feito de que a nosa compañeira Silvia Nadela Villarino fixo por primeira vez de solista desde o atril da epístola nas partes dialogadas do Sanctus de Lourdes.

  A misa estivo presidida polo deán da Catedral, Mario Vázquez Carballo e concelebrada polo mestre de capela, Luís Varela Castiñeira, actuando como salmista o noso compañeiro de coro Carlos Sánchez e como organista Xavier de Acosta.

  O repertorio interpretado polo Orfeón baixo a dirección habitual de Marcos Fernández Mosquera foi o seguinte:

    - Himno a San José. José Antonio Poblete.

    - Kyrie en Re Majeur. J. P. Lécot.

    - Gloria de Lourdes. J. P. Lécot.

    - Interleccional. X. Castiñeira.

    - O salutaris hostia. Pierre de la Rue.

    - Sanctus de Lourdes. J. P. Lécot. Solista: Silvia Nadela Villarino.

    - Agnus Dei de la Messe Peuples de la Terre. G. Rossini. Adap.: J. P. Lécot.    

    - Más cerca, ¡oh Dios!, de Ti. L. Mason.


   Enlazamos a continuación o audio do Sanctus de Lourdes. Pica na imaxe para escoitalo.



                                        Sanctus de Lourdes. (J. P .Lécot)

                                         Solista: Silvia Nadela Villarino