sábado, 17 de xullo de 2021

Misa da Nosa Señora do Carme

   Este ano fomos invitados por primeira vez a cantar a Misa da Nosa Señora do Carme na capela do seu nome. Chamounos a atención a beleza da construción pero tamén o deterioro de varios elementos que a conforman. Non obstante estaba ateigada de fieis, moitos dos cales tiveron que seguir a cerimonia desde o exterior.

   O Orfeón Lucense cantou desde o coro o seguinte repertorio:

- Himno a la Virgen del Carmen.

- Gloria. J. P. Lécot.

- Aleluya. I. G. Ramos.

- O Salutaris. L. Perosi.

- Santo. Misa Pascual. X. Castiñeira.

- Ave María. T. L. De Victoria.

- Hija del pueblo, María. A. Taulé.


   Na imaxe, o momento da chegada do Orfeón ao coro da capela.






domingo, 11 de xullo de 2021

III Noite Coral

   Vén sendo tradición que nos primeiros días do mes de xullo as voces da cidade de Lugo fagan un circuito de concertos por distintas igrexas do centro como remate do Festival Internacional de Órgano do Corpus Christi. 

  Nesta ocasión Orfeón Lucense, Sólo Voces e Coro do Hospital actuaron nas igrexas de San Froilán, A Nova e Franciscanos respectivamente, para un público reducido por mor da pandemia, pero fiel a este evento que xa suma a súa terceira edición.

   O repertorio interpretado polo Orfeón foi o seguinte:

- Jesu, Rex Admirabilis. G. P. da Palestrina.

- Alma Redemptoris Mater. G. P. da Palestrina.

- Drop, drop, slow tears. Orlando Gibbons.

- Dulcis Christe. Michelangelo Grancini.

- Ave Verum. W. A. Mozart.

- Non Nobis, Domine. Reuben Burrows.

   Finalizou a Noite no claustro da catedral, artísticamente iluminado, coa actuación do Concentus Lucensis entonando polifonía renacentista a sete voces mixtas.

   Enlazamos a continuación un momento da actuación do Orfeón. Ave Verum. W. A. Mozart.












   


sábado, 10 de xullo de 2021

Chegou a Noite Coral

   Hoxe é o Día. Hoxe é a Noite, a III Noite Coral. As Voces da Cidade ofrecerán concertos sucesivos en distintas igrexas, conformando este evento musical que xa vén sendo tradición.

   Orfeón Lucense, Sólo Voces e Coro do Hospital cantarán en San Froilán, Igrexa da Nova e Franciscanos respectiva e sucesivamente a partires das 21 horas. Poñerá punto final a actuación do Concentus Lucensis na Catedral ás 21 horas. Eis o cartel:




luns, 14 de xuño de 2021

Ofrenda do Antigo Reino de Galicia 2021

 Correspondeulle este ano presentar a Ofrenda á cidade de A Coruña, representada nesta ocasión polo concellal de Turismo, Juan Ignacio Borrego, en representación da alcaldesa de dita cidade.

O Orfeón Lucense actuou dirixido por Marcos Fernández Mosquera e acompañado ó órgano por Xabier de Acosta, interpretando o seguinte repertorio:

- Con ledicia vimos. A. Fdez León.

- Señor ten piedade. Misa Galega. X. Castiñeira.

- Contade as marabillas. A. S. Carneiro.

- Aleluia. X. R. Estévez.

- O pan do ceo. X. Portas Ferro.

- Hoc Hic Mysterium. J. Molejón.

- Pange lingua. Gregoriano.

- Tantum Ergo/ Genitori. Gregoriano.

- Cantemos al Amor. J. I. B. de Sagastizábal.


Ademais do Orfeón actuaron na celebración a agrupación tradicional Os Xílgaros interpretando marchas procesinais e Óscar Pérez que ofreceu xunto co organista Xabier de Acosta unha  solemne versión da Marcha do Antigo Reino de Galicia.

Enlazamos a continuación o vídeo do acto, tomado da canle de Youtube da Diócese de Lugo.


Vésperas da Oitava de Corpus

Retomamos a celebración das Vésperas da Oitava do Corpus. Despois de máis dun ano voltamos a cantar desde o Coro e a desfrutar da maxestuosa vista da catedral desde alí.

O Orfeón cantou dirixido por Marcos Fernández Mosquera e acompañado ao órgano por Xavier de Acosta. O repertorio foi o seguinte:

- O salutaris. L. Perosi.

- Antífonas e salmos. Gregoriano.

- Magnificat. Gregoriano.

- Ave Verum. W. A. Mozart.




luns, 7 de xuño de 2021

Corpus Christi 2021

Foi para nós un pracer poder celebrar este ano a solemnidade do Corpus despois da interrupción do ano pasado a causa do confinamento, e con maior motivo por cantar  cos amigos do Coro do Hospital de Lugo.

A liturxia celebrouse na Praza de Santa María, dada a bonanza meteorolóxica, observando todas as medidas hixienicosanitarias e con algúns cambios respecto doutros anos, impostos pola situación de pandemia que aínda vimos padecendo.

O Coro do Hospital e o Orfeón Lucense compartimos a parte musical dos oficios, dirixidos por Fernando Gómez Jácome e Marcos Fernández Mosquera, acompañados ó órgano por Luís Varela Castiñeira, Mestre de Capela da Catedral de Lugo; ademais da Agrupación de Música Tradicional Os Xílgaros e a intervención de Rosa e a súa familia.

O repertorio coral foi o seguinte:

- Con ledicia vimos. A. Fernández León.
- Señor ten piedad. Misa Solemne. X. Castiñeira Pardo.
- Gloria. J. P. Lécot.
- Aleluya. Isauro G. Ramos.
- Santo. Misa Solemne. X. Castiñeira Pardo.
- Cordero de Dios. Misa alrededor de tu Mesa. F. Palazón.v
- Yo soy el pan de vida. S. Toole.
- O salutaris. L. Perosi



martes, 18 de maio de 2021

Retomando a vida

Comezamos a ensaiar no Claustro da Catedral para as solemnidades do Corpus Christi e para a Noite Coral 2021. Cantamos en grupo reducido e cumprindo estrictamente as medidas propostas polas autoridades. Alédanos poder albiscar de novo a vida!!

Nas imaxes distintos momentos dun ensaio da Noite Coral.






sábado, 24 de abril de 2021

Misa de funeral polo noso amigo Miguel

   As circunstancias sanitarias impedíronnos no seu día despedir a Miguel Soto Camacho, amigo, músico e seguidor moi querido do Orfeón, que nos deixou o 26 de abril do ano pasado.

    Por iso este sábado achegámonos á igrexa parroquial da Milagrosa para estar coa nosa compañeira Manuela Guardado Méndez, a súa dona, e adicarlle os nosos cantos a Miguel, que tantas veces nos veu escoitar.

   Un grupo reducido de cantores interpretou durante a misa de funeral o seguinte repertorio:

Más cerca, oh Dios. L. Mason

Señor ten piedad. Misa Alrededor de tu mesa. F. Palazón.

Aleluia. G. F. Haendel.

Santo. Misa Pascual. X. Castiñeira.

Jesu, Rex admirabilis. G. P. da Palestrina

Ven, Señor, ás nosas almas. L. Olano.

    Ao finalizar o acto o Presidente do Orfeón, Xulio Xiz, adicoulle ao amigo que se nos foi unhas emotivas palabras que compartimos a continuación:

            Manoli encargoume que, no nome da familia, vos dese as grazas a todos os presentes pola participación nesta celebración en memoria de Miguel, o noso amigo, e eso fago facendo extensivo este agradecemento especial á igrexa da Milagrosa e a José Antonio, o noso párroco, por acollernos neste momento tan especial para a familia e os amigos.

         E quero ter unha lembranza especial e garimosa para Miguel, músico e devoto da música, que nos ten acompañado en tantas incursións musicais aportando o seu entusiasmo, a súa presenza e o seu coñecemento.

         Porque teño que lembrar primeiro a Miguel cando, hai arredor de medio século, participaba nos festivais de Nadal que nesta parroquia se celebraban para recadar fondos e atender necesidades. Aí coñecimos e atopamos o primeiro Miguel, e co paso dos anos reencontrámonos con el e con Manoli, ela con destacada afección e potencia cantora, el co coñecemento e o entusiasmo.

         Por iso, estas voces amigas que hoxe soan nesta igrexa quixeron lembrar a Miguel e arroupar a Manoli e a súa familia, porque cremos firmemente que nos tempos difíciles coma os que vivimos (dixo o poeta: "nos queda la palabra") a palabra feita canción é moito máis ca un bálsamo; é unha oración, é unha man tendida, é unha aperta…

         Reitero as grazas da familia pola vosa presencia, e quero rematar lembrando ao Miguel músico e amigo.

          Micky, o veterano cantante, hai xa moito tempo que nos fixo pensar e sentir coa súa canción “El chico de la armónica”, cando cantaba. “Escucho / al muchacho tocar / esa triste canción / con su armónica de amor”.

         Para nós, os seus amigos, Miguel sempre será o rapaz da harmónica, que tocaba cancións fermosas, nunca tristes, entrañables, que chegaban aos oídos, e deles ao corazón. Miguel, como dicía Micky, coa súa “armónica de amor” axudou a sermos un chisco máis felices… E hoxe, que lembramos que hai xa un ano que nos falta, tiñamos que dicilo aquí.

         Grazas  a todos, e ata sempre a Miguel coas oracións e, naturalmente, coas cancións dos seus amigos.










domingo, 3 de xaneiro de 2021

Concerto de Nadal 2020

Con aforo limitado e programa e coro reducidos celebramos no altar do Bon Xesús o Concerto de Nadal 2020.

Un total de nove pezas conformaron o recital:

- En una choza oscura. Michael Praetorius. Adap. Xosé Castiñeira.
- Gabriel, el Ángel. Edgard Pettman. Adap. Carlos Rodríguez.
- Linda Noite. Popular portuguesa.
- The First Noel. Harm. John Stainer.
- Canto de berce para unha Princesa Negra. Antoni Rodríguez Sabanés.
- La vieja. Harm. Alicia Parker e Robert Shaw.
- Noite boa. Xosé Castiñeira Pardo.
- Chiquirriquitín. Harm. Oriol Martí.
- Nació, nació, pastores. Amadeo Vives.

Interpretadas fóra de programa:

- Benedicat bovis. George Frideric Haendel.
- Noche de Dios. Franz Gruber. Adap. Xosé Castiñeira.


Nesta ocasión o concerto estivo codirixido por Marcos Fernández Mosquera, director habitual do Orfeón; Silvia Nadela e Lupe Enríquez, compoñentes do coro e Luís Varela Castiñeira, Mestre de Capela da Catedral. Sobre os seus nomes enlazamos os vídeos correspondentes

Despois dun largo tempo sen apenas ensaios e concertos debido á pandemia, esta actuación tivo especial importancia para os membro da nosa formación coral desde o punto de vista afectivo, pois constituiu un punto de encontro desexado por todos.

Aquí unha imaxe do acto: