Amosando publicacións coa etiqueta Catedral. Amosar todas as publicacións
Amosando publicacións coa etiqueta Catedral. Amosar todas as publicacións

luns, 17 de agosto de 2026

Misa de Nosa Señora 2026

    O Orfeón Lucense participou este sábado na misa solemne de Nosa Señora que, baixo a advocación da Virxe dos Ollos Grandes, é a patroa de Lugo. 

  Celebrouse na Catedral e estivo presidida polo prelado da diócese, D. Alfonso Carrasco Rouco, concelebrada por varios cóengos asistidos por ministros auxiliares e contou coa asistencia dos membros da corporación municipal e outras autoridades ademais de numerosos fieis.

  O Orfeón, dirixido por Sara Nebra e acompañado ao órgano por Nemesio Gutiérrez e Andrés Gutiérrez, interpretou o seguinte repertorio:

  • Himno a la Virgen de los Ojos Grandes. Ángel Garrote /Julián Ortiz.
  • Kyrie en Ré Majeur. Jean  Paul Lécot / Paul Décha.
  • Gloria de Lourdes. Jean Paul Lécot.
  • Alléluia. Isauro García Ramos.
  • Nitida stella. Anónimo S. XVIII. Harm. M. Gemmani.
  • Sanctus de Lourdes. Jean Paul Lécot.
  • Agnus Dei de la Messe "Peuples de la Terre". Gioachino Rossini / Jean Paul Lécot.
  • Ave Maria. Tomás Luis de Victoria.
  • Anima Christi. Marco Frisina.

 Ao finalizar a misa, os oficiantes, autoridades e fieis desprazáronse ata o camarín da Virxe dos Ollos Grandes. Alí a nosa compañeira Ángeles Rodríguez Fontela pronunciou unha plegaria á que sucedeu a ofrenda floral presentada pola alcaldesa da cidade, Elena Candia.  Mentras tanto no coro da sé soaba a Cantiga 77 de Afonso X O Sabio de título Da que Deus mamou, na que se narra un milagre sucedido en Lugo: a curación dunha muller tolleita  por mediación da Virxe.

  Sobre a singular beleza e o significado da capela na que se venera á nosa patroa enlazamos aquí, por consideralo de interese, un traballo de Dolores Vila Jato, da Universidade de Santiago, publicado pola Universidade de Valencia baixo o título de La capilla de la Virgen de los Ojos Grandes de la Catedral de Lugo, un espacio de exhaltación mariana.

  Hai que sinalar que nesta actuación tivemos a honra de contar  con dous cantores de excepción: Lidia Basterretxea, soprano profesional e profesora de Canto e Giulio Mercati, organista, compositor, profesor e director artístico do Festival Internacional de Música de Órgano da Diócese de Lugo, ambos residentes en Saronno (Italia), cun amplo desenvolvemento profesional no eido da Música e as artes escénicas en diferentes lugares de Europa. Os dous son amigos da nosa agrupación coral aos que agradecemos a súa presenza.

  Por outra parte, nesta actuación remata unha nova etapa do Orfeón baixo a dirección de Sara Nebra, quen cesa a petición propia por incompatibilidade coa súa actividade profesional como profesora de Canto e a quen agradecemos a súa aportación durante este curso.

   Nas imaxes, en sentido descendente: un momento da celebración, a ofrenda e a lectura da plegaria por Ángeles Rodríguez Fontela e unha imaxe do Orfeón Lucense con Sara Nebra.





mércores, 8 de xullo de 2026

VIII Noite Coral Lucense

   O pasado sábado, día 4 de xullo, celebramos a VIII Noite Coral Lucense, un circuito itinerante de concertos de música sacra que se leva a cabo en templos emblemáticos do centro histórico da cidade e que o Departamento de Música Litúrxica da Diócese de Lugo vén organizando con gran acerto e éxito.

   Esta edición comezou ás 20:30 coa actuación do Orfeón Lucense na igrexa de S. Pedro, á que seguiron o Gruppo Vocale San Bernardo na igrexa de S. Froilán, Carminis Habitus na igrexa da Nova e Solo Voces na igrexa dos Franciscanos; seguindo o programa que se adxunta na imaxe.

   O Orfeón estivo dirixido pola súa titular, Sara Nebra, acompañado ao órgano positivo por Andrés Gutiérrez Fernández e o repertorio interpretado foi o seguinte:

  • Anónimo do s. XVIII. Nitida stella.

  • Tomás Luís de Victoria (1548 - 1611). Ave María.
  • Jouzas Naujalis (1869 - 1964). In Monte Oliveti.
  • Esteban Tozzi (1962). Pater noster.
  • Karl Kempter (1819 - 1871). Gloria. Pastoralmesse.

      Actuaron como solistas en Nitida stella, Pater noster e Gloria:

      Sara Nebra, soprano

      Beatriz Enríquez Parga, alto

      Lupe Enríquez Parga, alto

      Abraham Sánchez Pujante, tenor

      Marcos Fernández Mosquera, baixo

      David Ocón Ruiz, baixo

   Dada a duración total do acto, limitouse o tempo de actuación de cada agrupación para permitir que os seareiros puideran asistir a todas elas sen sobrepasar os límites da súa atención. Así, cada 30 minutos comezou un recital, dando tempo para os desprazamentos dun lugar ao outro. 

    Como en cada edición, o final foi na Catedral, reunindo a todos os cantores para interpretar a Historia di Jephte de Giacomo Carissimi, unha obra pertencente ao barroco que recolle un relato do Libro dos Xuices no cal se pón de manifesto a integridade, a valentía dos protagonistas e tamén a imprudencia de facer votos de maneira impulsiva sen calibrar as consecuencias.

   Esta última obra estivo dirixida por Giulio Mercati e acompañada polo
Concentus instrumentalis Lucensis
, cuxos compoñentes, así como os solistas e directores de todas as agrupacións especifícanse no programa que se adxunta na imaxe.

    A oitava edición da Noite Coral foi ocasión dunha dobre estrea para o Orfeón: Por  primeira vez fixemos a gravación íntegra dun concerto noso con cámara propia e os aditamentos correspondentes e tamén por primeira vez anunciamos ao público quen somos mediante un rollup no que figura a imaxe da coral diante da Catedral de Santa María, da que somos o coro titular. A este soporte publicitario adherimos un código QR co enlace ao programa de cada actuación.

    Finalizada a actuación e unha vez que o público ía xa camiño da igrexa de San Froilán para o seguinte concerto, fóronlle entregados polo Presidente da agrupación, Xulio Xiz Ramil, sendos agasallos aos directores que conduciron o Orfeón nos últimos anos: Marcos Fernández Mosquera, (2012 - 2025), Sara Nebra no presente curso, Abraham Sánchez Pujante e Lupe Enríquez Parga, que formaron parte do equipo de dirección no período que agora finaliza. Neste momento a actual directora, Sara Nebra, aproveitou para comunicar a todos os membros a súa decisión de non continuar no cargo por motivos persoais de incompatibilidade co seu traballo actual de profesora de Canto nunha escola de música de A Coruña.

   Nas imaxes, en sentido descendente, o programa da velada musical, un momento da actuación da nosa agrupación coral, o banner  publicitario do Orfeón Lucense, dous momentos da entrega de agasallos e unha instantánea do concerto final na Catedral.









   

      

luns, 8 de xuño de 2026

Misa de Corpus Christi 2026

    O domingo, 7 de  de xuño, foi a solemnidade do Corpus Christi. Na Catedral de Lugo sempre é unha das festividades de maior realce que nesta ocasión tamén estivo presidida polo prelado da diócese, D. Alfonso Carrasco Rouco, acompañado por membros da curia catedralicia e ordes auxiliares.

    Desde hai anos xa é tradición que na Catedral de Lugo, se o tempo o permite, se celebre unha misa na Praza de Santa María para darlle maior brillo e visibilidade. Así foi tamén nesta ocasión. 

   Desde a primeira hora da mañá estaba instalado un altar diante do Pazo Episcopal e adornadas as escaleiras con alfombras e flores. A praza lucía ben luminosa, chea de sillas brancas que serían ocupadas despois por un bo número de fieis, músicos e coristas. 

   Na parte dereita da praza, mirando ao altar, situáronse os  encargados da  parte musical da liturxia, que correu a cargo do Coro do Hospital e o Orfeón Lucense acompañados pola Banda Filarmónica, dirixidos por Sara Nebra e Iván Martínez Sabio e actuando nas partes solistas Abraham Sánchez Pujante. 

 

    O repertorio interpretado por coros e banda foi o seguinte:

  • Con ledicia vimos. Antón Fdez León.
  • Missa brevis. Kyrie. Jacob de Haan.
  • Gloria de Lourdes. Jean Paul Lécot.
  • Aleluia. Isauro García Ramos.
  • Ave verum. Wolfgang Amadeus Mozart.
  • Sanctus-Benedictus. Missa brevis. Jacob de Haan. Arr. Abraham Sánchez Pujante.
  • Agnus Dei. Missa brevis. Jacob de Haan.
  • Pescador de hombres. Cesáreo Gabaráin.
  • Cantemos al Amor. Ignacio Busca de Sagastizábal. 

    Finalizada a misa, saiu a procesión acompañada polo grupo tradicional Os Xílgaros e a Banda Filarmónica seguida das autoridades e o público que percorreron as rúas do centro histórico. Ao pasar pola Ronda á altura das oficinas do Concello, a comitiva detívose brevemente para escoitar de novo aos dous coros, previamente situados alí, para interpretar Cantemos al Amor, o himno de Ignacio Busca de Sagastizábal.

    Rematou esta festividade tan relevante da mellor forma, xa que a nosa agrupación celebrou o seu xantar anual de fin de curso.

   Nas imaxes, momentos do día. Agradecemos á Diócese de Lugo poder compartilas.


mércores, 3 de xuño de 2026

Actuación no XII Festival Internacional de Órgano do Corpus Christi

      O pasado luns, día 1 de xuño, tivo lugar a participación do Orfeón Lucense no XII Festival Internacional de Órgano do Corpus Christi. Como vén sendo habitual desde hai varios anos, aceptamos a invitación e preparamos este concerto con mimo e ilusión.

    Compartimos programa co organista cordobés Miguel Ángel García, músico de vasta formación e extenso curriculum, na actualidade profesor titular de Órgano do Conservatorio Profesional «Cristóbal de Morales» de Sevilla.

    Feitos os saúdos e a presentación do acto a cargo de Abraham Sánchez Pujante, Director de Música Litúrxica da Diócese, e ante numeroso público, deu comezo o concerto cunha peza enérxica de órgano, Batalla de clarines de José Nebra y Blasco (1702 - 1768). Esta obra deu paso á primeira intervención do noso coro á que foron sucedendo todas as demais con alternancia de obras vocais e instrumentais, ata a final, interpretada conxuntamente, seguindo o programa que se adxunta.

  Nesta edición a organización do Festival acordou, acertadamente, que as agrupacións corais actuasen fronte ao público na capela do Bo Xesús para acadar maior cercanía aos seus seareiros e mesmo un son máis próximo, agás as obras para voces e órgano que, para mellor entendemento entre coristas e organista, poden ser interpretadas desde o coro da Catedral


   Asimesmo, como outros anos foi instalada unha pantalla no sitio do altar desta capela para poder seguir con detalle os acenos das mans e dos pés do organista sobre dito instrumento, aspecto que sempre resulta vistoso, mesmo hipnótico, para os espectadores  polo virtuosismo dos músicos.

    O Orfeón, dirixido por Sara Nebra, interpretou o seguinte repertorio:


  • Karl Kempter (1819-1871). Sanctus. Pastoralmesse. Para órgano e coro.
  • Anónimo S. XVIII. Nitida Stella.
  • Anónimo S. XVIII. Qui, presso a Te.
  • Karl Kempter (1819-1871). Gloria. Pastoralmesse. Para órgano y coro.

    Unha vez feitos os saúdos conxuntos de organista e coro, o condutor da velada musical, Abraham Sánchez Pujante, agradeceu ao público a súa numerosa asistencia e fixo o anuncio do próximo concerto do ciclo, que será o mércores, día 3 na igrexa da Nova a cargo do organista italiano Tommaso Maria Mazzoletti e o grupo Son de Corda, concerto ao que convidou a todos os ouvintes.








luns, 6 de abril de 2026

Domingo de Pascua 2026

    Non pasaran moitas horas desde a nosa retirada tras o remate da Vixilia do Sábado Santo, cando volvemos a reunirnos para cantar a misa solemne do Domingo de Pascua na Catedral de Santa María.

  A cerimonia estivo presidida polo prelado da diócese, D. Alfonso Carrasco Rouco, acompañado por varios membros de distintos estamentos eclesiásticos que saíron ata a Praza de Pío XII para recibir a procesión do Santo Encontro procedente do Concello. Ao chegaren, situaron enfrontadas as imaxes de Xesucristo e a Virxe María, momento no que lle quitaron a esta o veo negro que levaba en sinal de loito pola morte do seu fillo.

   Finalizada a procesión deu comezo a misa, na que o Orfeón Lucense, dirixido por Sara Nebra e acompañado ao órgano por Nemesio Gutiérrez González e Andrés Gutiérrez Fernández, interpretou o seguinte repertorio: 

  •  Cantemos al Amor de los amores. Juan Ignacio Busca de Sagastizábal.
  • Misa Pascual. Señor ten piedad. Gloria. Santo. Cordero de Dios. José Castiñeira.
  • Este es el día en que actuó el Señor. Salmo. Miguel Manzano.
  • Cantico dell´Agnello. Marco Frisina.
  • Yo soy el Pan de Vida. Suzanne Toolan. Harm.: A. Medina.
  • Reina del Cielo. José Castiñeira.
    Máis tarde sairía a Procesión de Cristo Resucitado percorrendo as rúas do casco histórico ata chegar á Igrexa de San Froilán, na Praza do Ferrol, poñendo punto final á Semana Santa 2026.

    Adxúntanse tres imaxes do día, xentileza da Diócese de Lugo.

    




    

    

domingo, 5 de abril de 2026

Vixilia Pascual. Sábado Santo 2026

     Cando chegamos á Catedral para facer os exercicios de quecemento vocal e dar os últimos retoques ao noso traballo, xa estaban iniciados no atrio os preparativos para os rituais iniciais da Vixilia Pascual.

   Partindo da escuridade total no interior do templo, os oficiantes desprazáronse ao exterior para bendecir o lume, no que se prendeu o cirio pascual. Os asistentes foron acendendo as súas velas nel e, en procesión, chegaron o altar maior dando luz progresivamente a todas as estancias ata a total iluminación habitual. Mentras sucedía isto o Orfeón contestaba aos salmos da procesión e aos que se alternaron coas lecturas, tras o cal se proclamou o Pregón Pascual.

   Despois de varias lecturas e salmos responsoriais continuou a misa o seu curso ata despois da homilía, momento no que tivo lugar a bendición da auga e o bautismo dun neófito, tras o cal se completou a cerimonia na forma habitual.

   A nosa agrupación coral, dirixida por Sara Nebra e acompañada ao órgano por Luís Varela Castiñeira, prefecto de Música da Catedral, interpretou o seguinte repertorio:

  • Envía tu Espíritu, Señor. Salmo.
  • Protégeme, Dios mío. Salmo
  • Cantemos al Señor. Salmo.
  • Sacaréis aguas con gozo. Salmo.
  • Misa de Lécot. Gloria, Sanctus, Agnus Dei. Jean Paul Lécot.
  • Aleluia. Isauro García Ramos.
  • Jesu! Rex Admirabilis / Jesu, dulcis memoria. Giovanni Pierluigi da Palestrina / San Bernardo di Chiaravalle.
  • Cantico del Agnello. Marco Frisina.
  • Yo soy el Pan de Vida. Suzanne Toolan. Arm.: A. Medina.
  • Regina Caeli. Gregoriano.
  Unha vez rematada a celebración fomos convidados todos os asistentes a compartir unha rosca de Pascua con chocolate na sancristía da Catedral, momento que aproveitamos para felicitarnos. 

    Acompañamos dúas imaxes do coro previas ao inicio da vixilia e unha do momento do lucernario.














    

    

    

    

    

    

    

sábado, 4 de abril de 2026

Venres Santo 2026

    Despois dunhas breves palabras de introdución e benvida por parte do monitor litúrxico, deu comezo ás 18.00 h. a liturxia do Venres Santo na Catedral de Santa María.

  Á entrada en silencio dos celebrantes, presididos polo prelado da diócese, monseñor Carrasco Rouco, e a postración no altar maior durante breves minutos, seguiron as lecturas da liturxia da Palabra e a adoración da Cruz.

    O Orfeón Lucense estivo dirixido pola súa titular, Sara Nebra, e interpretou a capela o repertorio seguinte:

  • Padre, a tus manos. Salmo. M. Manzano.
  • Cristo por nosotros. Francisco Palazón.
  • Pasión de Nuestro Señor Jesucristo según San Juan. José Castiñeira. Arr.: Abraham Sánchez Pujante.
  • Victoria, tú reinarás. André Losay. Arr.: David Julien.
  • Pueblo mío. Ricardo Cantalapiedra.
  • Comiendo del mismo pan. Joaquín Madurga.
  • In Monte Oliveti. Jouzas Naujalis.

  Tivemos a sorte de contar como corista na corda dos Baixos con un dos nosos organistas habituais e antigo director do Orfeón, Nemesio Gutiérrez González, xa que en Venres Santo non debe soar o órgano nin ningún outro instrumento.


 Rematada a celebración, as distintas confrarías organizaron a saída en procesión de todos os pasos que percorreron as rúas lucenses durante toda a semana, procesión que estaba sendo esperada no exterior por numerosos fieis nunha tarde que lucía luminosa e temperada.

    Acompañamos unha imaxe do interior da catedral e unha do exterior tomadas ambas da páxina web da Diócese de Lugo neste día. Agradecidos por compartilas.





    

    

venres, 3 de abril de 2026

Xoves Santo 2026

    Seguindo a tradición eclesiástica, tivo lugar na Catedral de Santa María a vespertina Misa da Cea do Señor, en lembranza da última cea que Xesús celebrara cos seus discípulos antes do seu prendemento. Con ela iníciase o Triduo Pascual que finalizará o Domingo de Resurrección.

    A cerimonia estivo presidida polo prelado da diócese, monseñor Carrasco Rouco, e contou coa asistencia de diferentes membros do clero, acólitos e numerosos fieis.

    O Orfeón, dirixido por Sara Nebra, e acompañado ao órgano por Nemesio Gutiérrez González e Andrés Gutiérrez Fernández interpretou as seguintes composicións:


    Ademais das mensaxes  propias da celebración ás que aludiu o prelado, chama a atención nesta data o ritual do lavatorio de pés que o bispo realiza a doce persoas presentes no acto, simbolizando o amor e servizo de Cristo á humanidade.

  Finalizada a misa, que neste día non tén bendición final, comezou unha procesión para trasladar o Santísimo a un monumento instalado na capela do Bo Xesús, que lucía especialmente fermosa, mentras se entonaba o Pange lingua gregoriano e Cantemos al Amor.

  E para rematar a celebración fixo a saída a Procesión da Santa Cea que percorreu as principais rúas do casco histórico e que foi seguida por un número considerable de persoas. 

    Acompañamos imaxes da celebración por xentileza da Diócese de Lugo.






    
    
    


martes, 31 de marzo de 2026

Domingo de Ramos 2026

    Iniciamos  a participación do Orfeón nesta Semana Santa coa actuación na Misa solemne do Domingo de Ramos que deu comezo despois da bendición das palmas e ramos que habitualmente tén lugar na Praza de Santa María.

  Presidiu a celebración o bispo da diócese, monseñor Carrasco Rouco, auxiliado por membros de distintos estamentos eclesiásticos e con numerosa asistencia de fieis.

   O Orfeón dirixido pola súa titular, Sara Nebra, e acompañado ao órgano por Nemesio Gutiérrez e o seu fillo Andrés Gutiérrez, interpretou o seguinte repertorio:

  • Dios mío, Dios mío. Salmo.
  • Cristo por nosotros. Francisco Palazón.
  • Deus do Universo. Luís Olano.
  • Sanctus-Benedictus. Missa brevis. Jacob de Haan. (arr. Abraham Sánchez Pujante).
  • Agnus Dei. Missa brevis. Jacob de Haan.
  • Eucaristía. A. Fdez. León (Taizé).
  • Ánima Christi. Marco Frisina.

    Debemos facer constar aquí a estrea neste día das novas gradas do coro da Catedral, feito co que a nosa agrupación puido ver cumprida unha das súas peticións desde hai ben tempo.

   Agradecemos infinitamente esta xestión á nosa compañeira Trinidad Vázquez Luaces e á Diócese de Lugo, pois a nova ubicación dos coristas e a directora redunda en beneficio da seguridade e comodidade de todos os membros e, en suma, dunha boa sonoridade e calidade do canto.

      Ao remate da misa, numerosos fieis acompañaron a procesión da Borriquita, que percorreu as principais rúas do casco histórico da cidade neste día solleiro e de bonanza primaveral.

    Así finalizou a grata xornada, da que adxuntamos imaxes tomadas da páxina web da Diócese de Lugo.





    

domingo, 29 de marzo de 2026

Ante a Semana Santa

     Como preparación para a Semana Santa o Orfeón Lucense ensaia un repertorio de cantos propios da liturxia destes días para acompañar e, se cabe, realzar os oficios que se celebran na Catedral de Lugo, da que somos o coro oficial e na que actuaremos nas datas máis senlleiras.

    Ante a proximidade destas actuacións, e coincidindo coa inauguración das novas gradas construídas para a ubicación dos cantores no coro, asunto para o que foi crucial o concurso da nosa compañeira Trinidad Vázquez Luaces e que tanto agradecemos; a Directora de Comunicación da Diócese de Lugo, María José Campo López-Barcia, entrevistou ao Vicepresidente e compoñente do Orfeón, Ricardo Coria Abel para falar do Orfeón e o seu desempeño nestas datas,  entrevista que enlazamos aquí.

    Para facilitar o seguimento da nosa intervención, adxuntamos de seguido o programa de cantos  de cada día nesta Semana Santa.













    

    

martes, 9 de decembro de 2025

Misa da Inmaculada 2025

    Este luns, día 8 de decembro, o Orfeón Lucense cantou a misa da festividade da Inmaculada Concepción, como vén sendo habitual. A celebración estivo presidida polo prelado da diócese, D. Alfonso Carrasco Rouco, acompañado de varios coengos e outros cargos catedralicios.

    A nosa coral, dirixida pola súa titular, Sara Nebra, e acompañada ao órgano por Nemesio Gutiérrez, interpretou o seguinte repertorio:

  • ¡Qué hermosa sois!
  • Señor ten piedade. Gloria. Santo. Año de Deus. Misa Galega. José Castiñeira.
  • Aleluia. Isauro García Ramos.
  • Hija del pueblo. Alberto Taulé.
  • Ave María. Tomás Luis de Victoria (atribuído).
  • Da que Deus mamou. Cantiga nº 77. Afonso X o Sabio.

    Na imaxe, Inmaculada Concepción, chamada Esquilache. Bartolomé Esteban Murillo. Óleo sobre lenzo. Museo de l´Hermitage. San Petersburgo.




    

 

domingo, 30 de novembro de 2025

Misa de clausura do Curso de Pastoral da Saúde

    Este sábado, 29 de novembro, o Orfeón foi convidado a cantar a misa de clausura do Curso de Pastoral da Saúde organizado por esta diócese.

    A celebración tivo lugar na catedral e estivo presidida por D. Miguel Ángel Fernández Vilariño, Delegado Episcopal de Pastoral da Saúde.
 
  A nosa coral estivo dirixida por Abraham Sánchez Pujante, acompañada ao órgano por Nemesio Gutiérrez e o repertorio interpretado foi o seguinte:

  • Ven Señor ás nosas almas. Luís Olano.
  • Kyrie en Ré Majeur. Jean Paul Lécot.
  • Qué alegría. Salmo.
  • Aleluia. Isauro García Ramos.
  • Ave Verum. Jean Paul Lécot.
  • Sanctus de Lourdes. Jean Paul Lécot.
  • Agnus Dei de la Messe Peuples de la Terre. Gioachino Rossini. Adapt.: Jean Paul Lécot.
  • Anima Christi. Marco Frisina.
                                     
   Nas imaxes, momentos previos ao inicio da misa.




    

luns, 24 de novembro de 2025

Misa na visita do cabildo da Catedral de León

    O sábado, día 22 de novembro, o Orfeón puxo o acompañamento musical a unha misa que se celebrou na catedral lucense con motivo da xornada de confraternización das catedrais de León e Lugo, personalizada nos seus cabildos, pois ambas catedrais están unidas pola vía Künig e polo patrón de ambas cidades, San Froilán.

    O deán da sé lucense, D. Mario Vázquez Carballo, foi o oficiante, auxiliado por outros membros do cabildo lucense e leonés e coa asistencia de numerosas persoas.

    O Orfeón, dirixido pola súa titular Sara Nebra, e acompañado ao órgano por Nemesio Gutiérrez interpretou o seguinte repertorio:

  • Bendiga mi alma al Señor. Felix Mendelssohn. Adap. Abraham Sánchez Pujante.
  • Kyrie en Ré Majeur. Jean Paul Lécot.
  • Gloria de Lourdes. Jean Paul Lécot.
  • Aleluia. Isauro García Ramos.
  • Ave Verum. Jean Paul Lécot.
  • Sanctus de Lourdes. Jean Paul Lécot.
  • Agnus Dei de la Messe Peuples de la Terre. Jean Paul Lécot.
  • Anima Christi. Marco Frisina.
    Os acordes ao órgano da Marcha do Antigo Reino de Galicia a cargo de Nemesio Gutiérrez deron remate a este acto de confraternización.

    Nas imaxes, interiores da catedral de León e de Lugo, respectivamente.










martes, 14 de outubro de 2025

Misa en Latín 2025

     Un ano máis fomos convidados pola asociación de antigos alumnos da Escola de Artes Aplicadas Ramón Falcón a cantar na Misa en Latín que dita agrupación organiza como un dos actos da Feira Medieval instalada habitualmente o 12 de outubro no adro da Catedral e Praza de Santa María.

    A celebración foi oficiada por D. Rodrigo Rúa Iglesias e actuou como lector D. Gonzalo Fraga Vázquez. O Orfeón situouse nesta ocasión nas escaleiras da Porta Norte do templo e interpretou o seguinte repertorio baixo a dirección de Sara Nebra:

  • Jesu! Rex admirabilis. Giovanni Pierluigi da Palestrina.
  • Misa de Angelis. Kyrie, Sanctus, Agnus Dei. Gregoriano.
  • Alleluia. Gregoriano.
  • Jesu dulcis memoria. Gregoriano.
  • Adoramuste Christe. Théodore Dubois.
  • Anima Christi. Marco Frisina.
  • Da que Deus mamou. Cantiga 77. Afonso X ´O Sabio´.
    
    Por primeira vez esta misa non puido ser celebrada en latín, como era o habitual, senón en castelán, por non estar dispoñible ningún sacerdote que a puidera oficiar en dita lingua. Este feito quizáis foi debido en parte a que coincidiu o día 12, data da súa celebración, a domingo; día da semana no que os presbíteros adoitan estar ocupados coas súas obrigas parroquiais. Tampouco hai que esquecer o feito de que paulatinamente van quedando cada vez menos oficiantes en latín, por razón de idade.

    Na imaxe, un momento da celebración.






    

    

sábado, 16 de agosto de 2025

Misa de Nosa Señora 2025

     Este venres o Orfeón Lucense asistiu á celebración da festividade da patroa de Lugo, a Virxe dos Ollos Grandes.

    A cerimonia solemne celebrouse na Catedral de Santa María e estivo presidida polo bispo da diócese, D. Alfonso Carrasco Rouco, acompañado de distintos cargos do estamento eclesiástico. Entre os asistentes estiveron diferentes autoridades, a corporación municipal e numeroso público que enchía en boa parte a sé.

    O Orfeón estivo dirixido pola súa titular, Sara Nebra, acompañado ao órgano por Nemesio Gutiérrez e o seu fillo Andrés Gutiérrez e interpretou o seguinte repertorio:

  • Himno a la Virgen de los Ojos Grandes. Ángel Garrote /Julián Ortiz.
  • Kyrie en Ré Majeur. Jean  Paul Lécot / Paul Décha.
  • Gloria de Lourdes. Jean Paul Lécot.
  • Alléluia dit Irlandais. Fintan O´Caroll / Lucien Deiss.
  • Deus do Universo. Luís Olano.
  • Sanctus de Lourdes. Jean Paul Lécot.
  • Agnus Dei de la Messe "Peuples de la Terre". Gioachino Rossini / Jean Paul Lécot.
  • Hija del pueblo. Alberto Taulé.
  • Ave verum. Jean Paul Lécot.

    Finalizada a misa, celebrantes, coro e público trasladáronse ao camarín da Virxe dos Ollos Grandes onde a representante do Concello fixo unha ofrenda floral á patroa e, tras os rezos e a beizón do prelado, a nosa agrupación entoou a Cantiga nº 77 de Afonso X O Sabio titulada Da que Deus mamou, que narra o milagre da curación dunha muller tolleita sucedido en Lugo e atribuído á nosa patroa.

    Na imaxe superior a miniatura e tradución da Cantiga nº 77 e na inferior a nosa agrupación nun momento posterior á celebración.