Concerto en San Tirso de Abres

    Por iniciativa da nosa compañeira Remedios Martínez Rodil fomos convidados polo Concello de San Tirso de Abres a dar un recital de panxoliñas na igrexa desta localidade. Así que o día 19 de decembro  puxemos rumbo á comunidade veciña para cumprir co noso cometido.

    Acolleunos unha fermosa igrexa do século XVI situada na parte máis alta do pobo, con dúas amplas portas e dúas naves separadas por arcos de medio punto, moi ben conservada, cun retablo principal de estilo barroco, co teito recuberto de madeira e con moi boa sonoridade. O emprazamento invitaba a cantar con comodidade e boa disposición no espazo.

    Situados nas gradas do altar maior, demos comezo ao concerto con puntualidade ante un público ben agradecido que deu mostras de agrado tanto ao longo do recital como ao seu remate.

    O Orfeón estivo dirixido pola súa titular, Sara Nebra, e interpretou o repertorio seguinte:

• En una choza. M. Praetorius. (*)

• Nosa Señora. Tradicional de Galicia.

• The First Noel. Trad. inglés. Arr. John Stainer. (*)

• No pendello. Tradicional de Galicia.

• Blue Christmas. Billy Hayes / Jay Johnson. Arr. J. L. Blasco. (*)

• Noche de Dios. F. X. Gruber. Arr. José Castiñeira. (*)

• Gaudete. Piae Cantiones. (*)

• Niño Dios d´amor herido. Francisco Guerrero.

        Solistas:

                     Abraham Sánchez Pujante

                     Beatriz Enríquez Parga

                     David Ocón Ruiz

                     Guadalupe Enríquez Parga

                     Marcos M. Fernández Mosquera

                     Sara Nebra

• Noite boa. José Castiñeira.

• 
  O Magnum Mysterium. Evan Ramos.

• Linda Noite. Popular de Portugal.

• Transeamus usque Bethlehem. Hubert Cuypers.

• Con un sombreiro de palla. Tradicional de Galicia. (*)

• African Noel. Trad. africano. Arr. Victor Johnson. (*)

• En el portalín de piedra. Víctor Manuel San José. (*)

        Solista: 

                   Marcos M. Fernández Mosquera

        Instrumentistas (*):

                   Frauta travesa: Abraham Sánchez Pujante

                   Frauta de pico: David Ocón Ruiz

                   Adufe: Sara Nebra

                   Clarinete, adufe, darbuka e cunchas: Guadalupe Enríquez Parga.

    A petición dos ouvintes, o coro interpretou un bis, para o que a directora elixiu a panxoliña popular galega No pendello.

 Finalizou a xornada cunha xuntanza galegoasturiana amenizada polo grupo de gaiteiros Brisas do Eo que fixo a ledicia de todos os presentes. Así rematou unha das xornadas máis divertidas e motivadoras ás que puido asistir o Orfeón nos últimos tempos. Agradecemos á nosa compañeira Reme e ao Concello de San Tirso de Abres a oportunidade que nos brindaron e esperamos poida repetirse noutro momento.

    Nas imaxes, unha vista exterior da igrexa de San Tirso, unha vista do interior e un momento da actuación do Orfeón Lucense.

Misa na Catedral de Astorga

  Chegou o día esperado. Tras unha moi agradable viaxe propiciada por Marcial, un condutor sereo e eficaz, pisamos Astorga nunha mañá soleada e coa temperatura xusta para estar cómodos. 

  Esperábanos a Catedral ateigada de visitantes e fieis, igual que a cidade, que bulía especialmente con motivo dunhas xornadas gastronómicas que estaban tendo lugar alí.

  Admiramos o fermoso templo de estilo gótico tardío, barroco e renacentista; con numerosas vidreiras, abundante imaxinería e unha disposición do coro e do órgano un tanto chocantes para nós, tanto polo seu acceso, moi angosto, como pola súa colocación: enfrontados ambos entre si e situados perpendicularmente aos oíntes e ao altar. Disposición que non impediu aos fieis apreciar e valorar a sonoridade dos nosos cantos.

  Tras un ensaio xeral coa organista, comezou a misa presidida por D. Jesús Fernández González, prelado da diócese, na que o Orfeón Lucense, dirixido por Marcos Fernández Mosquera, interpretou o seguinte repertorio:

 

  - Hoy proclamamos. L. Burgeoise.

  - Señor ten piedad. Misa Alrededor de tu mesa. F. Palazón.

  - Gloria. Misa Alrededor de tu mesa. F. Palazón.

  - Aleluya de los irlandeses. J. P. Lécot.

  - O salutaris. L. Perosi.

  - Santo. Misa Alrededor de tu mesa. F. Palazón.

  - Anima Christi. M. Frisina.

  - Reina del Cielo. J. Castiñeira.

  Ao remate da celebración esperábannos o prelado e o salmista da Catedral para agradecernos a visita e felicitarnos pola actuación, así como para ofrecernos a posibilidade de volver cando o desexemos.

  De seguido, unha pequena parada para visitar a cidade e un xantar de confraternidade en Castrillo de los Polvazares puxeron fin a unha xornada que nos permitiu gozar da beleza de Astorga e a súa contorna e, ao mesmo tempo, convivir doutra maneira entre nós. Un especial agradecemento á nosa compañeira Remedios Martínez Rodil pola perfecta organización e loxística nesta viaxe.

  Na imaxe o Orfeón diante da Catedral de Astorga.