Noraboa!!

    O sábado, día 2 de agosto, o  Orfeón Lucense tivo a honra de acompañar á nosa directora, Sara Nebra, nun día moi especial para ela porque casaba. 

    Para os coristas foi unha xornada emocionante, porque aparecemos por sorpresa para cantarlle aos noivos e convidados á saída da cerimonia este pequeno repertorio, dirixido por Lupe Enríquez:

• Gabriel´s oboe. E. Morricone.

        - Oboe: Miguel Alonso Prada.

• Xoias d´auga. Sara Nebra / Arr.: Daniel Díaz. 

        - Pandeireta: Silvia Nadela.

        - Pao de choiva: Carmen Arias.

• Giovani liete. Acto I, nº 8 de As vodas de Fígaro.

        - Violín: Manuel Fernández Gayol.

    Ao finalizar o recital desexámoslle a maior FELICIDADE á parella e coa invitación a un aperitivo pola súa parte, despedimos este día sinalado pola emoción, tanto para eles como para o noso coro. 

Actuación en el Festival Internacional de Órgano del Corpus Christi 2025

    O pasado luns, 16 de xuño, tivemos a honra de actuar no segundo concerto do Festival de Órgano do Corpus Christi, protagonizado por Stanislav Surin, organista da Catedral de Bratislava.

 Preparamos con especial adicación e meticulosidade esta actuación pola  complexidade vocal dalgunhas das obras interpretadas e polo privilexio que supón ser acompañados por un organista de talla internacional como é o caso do mestre Surin.

   Tras os exercicios previos e cunha numerosa asistencia de público, ás 21:00 situámonos no coro da Catedral coa emoción  propia dun estreo, dispostos a ser conducidos por Marcos Fernández Mosquera, director habitual do Orfeón Lucense.

  O programa, variado e atractivo, estivo composto por obras vocais e instrumentais de compositores pertencentes aos séculos XVI ao XXI, cunha pequena homenaxe a Giovanni Pierluigi da Palestrina no  cincocentos aniversario do seu nacemento.

    O repertorio interpretado pola nosa agrupación coral foi o seguinte:

    - Jesu, Rex admirabilis. G. P. da Palestrina.

    - Ave Maria. T. L. de Victoria.

    - Quaerite primun regnum. W. A. Mozart.

    - Ave verum corpus. W. A. Mozart.

    - Miserere. G. Donizatti:

            Domine labia mea.

            Sacrificium Deo.

            Tunc acceptabis.

    - Nunc dimittis. C. Villiers Stanford. 

       Dirección: Lupe Enríquez.

    - Ave Maria. S. Surin.

       Soprano: Sara Pérez Cruz.

    - Sicut lilium inter spinas. M. Raczynski.

    - Cantate Domino. A. Gretchaninov.

    Rematado o recital, organista e coro desprazámonos ata o altar do Bo Xesús para agradecer os aplausos do público que seguiu o concerto desde dito lugar.

    A continuación pode verse o programa completo deste acto. 

    

        

    

    

Concerto homenaxe a Manuel Gulín Rodríguez

    O pasado venres, día 7 de marzo, reunímonos no Salón de Actos da Delegación da Xunta de Galicia o Coro de Amigos do Camiño de Santiago en Lugo, dirixido por Esperanza Iglesias, e o Orfeón Lucense, dirixido por Marcos Fernández Mosquera,  para lembrar e homenaxear cos nosos cantos ao falecido membro de ambos coros e Xefe da Sección de Patrimonio Monumental, Manuel Gulín Rodríguez.

    Lembramos a Gulín como un home cunha voz de baixo ben timbrada, calado, amante da Música e do Canto, das viaxes, da fotografía, afeccionado á pintura,  defensor do Arte e da Cultura en xeral. cun sentido do humor moi característico que poñía de manifesto principalmente nas xuntanzas informais e que nos deixou hai perto de ano e medio.

    Con asistencia de autoridades locais, de compañeiros, familiares e amigos, deu comezo o concerto cunha breve introdución do noso Presidente, Xulio Xiz, que fixo unha semblanza do finado ao que o unía unha longa amizade.

    De seguido comezou o concerto coa actuación do Coro de Amigos do Camiño que interpretou catro composicións e outras tantas a nosa agrupación. Estas últimas foron as seguintes:

• Morgengesang. Niels Wilhelm Gade.
• Gabriels oboe. Ennio Morricone. Arr. P. Rowlands.
• O meu amor mariñeiro. Xosé L. Rivas. Arr. B. Blanco.
• Bullerengue. José Antonio Rincón.

    A continuación o Delegado Territorial da Xunta en Lugo, Javier Arias, adicou unhas afectuosas palabras a Gulín e á súa familia, que foron contestadas pola filla do finado, quen agradeceu a todos e todas a súa presenza no acto.

  Rematadas estas intervencións, o noso presidente entregou un diploma conmemorativo do acto á súa viúva e Remedios Martínez Rodil, compoñente da directiva da nosa coral, obsequiouna cun ramo de flores en nome do Orfeón Lucense.

    Para finalizar, ambos coros interpretaron conxuntamente O voso  galo, comadre de M. Groba, dirixidos por Esperanza Iglesias, peza á que foron convidados a cantar no estrado os familiares de Gulín e o público presente dende os seus asentos.

    Ata sempre, Manuel Gulín.

                                               Cartaz do concerto homenaxe

Dobre actuación

    No mes de Nadal adoitamos ter múltiples compromisos, ata o punto de ter máis dunha actuación no mesmo día. Ese foi o caso do día 19 de decembro, no que tivemos que intervir na Biblioteca Nodal e na inauguración do belén da catedral.

    Na Biblioteca Nodal o repertorio interpretado polo Orfeón Lucense foi o seguinte:

    - Drop, drop, slow tears. O. Gibbons.

    

    - Ecce novum gaudium. 17th century Scottish song books.

    - Es ist ein´Ross´entsprungen. M. Praetorius.

    - Eu hei-de m´ir ao presépio. M. de Sampaio Ribeiro.

    - Natal de Elvas. M. de Sampaio Ribeiro.

    - Na noite máis fermosa. J. E, _Spitman. Adap. V. R. Abeijón.

    - Noiteboa. J. Castiñeira.

    - African Noël. Trad. africano. Arr. V. C. Johnson.

    - Señor, oye mi voz. A. Cuevas Castillo.

    - Ya viene la vieja. Trad. España. Harm.: A. Parker / R. Shaw.

    - Dime, Niño, de quién eres. Popular.    

    - Noche de Dios. F. X. Gruber. Arr.: J. Castiñeira.

    Acto seguido a agrupación trasladouse á catedral para cantar na inauguración do belén que se instala alí habitualmente unha breve selección de panxoliñas.

    Na imaxe o Orfeón nesta actuación ó pé do belén da catedral.

Concerto en Grijota (Palencia)

  Grijota é unha localidade de menos de 3.000 habitantes situada a 5 km. de Palencia. De alí recibimos unha invitación para facer un intercambio co coro Regina Angelorum e aceptamos gustosos. Así que o día 14 de decembro puxémonos en camiño.

 Foi unha viaxe agradable e sen incidentes a destacar con chegada para o xantar e un tempo de descanso posterior ata a hora convida para reunirnos na igrexa da Santa Cruz.

  É un templo grande do S. XVI situado na Praza Maior do pobo con elementos renacentistas e barrocos no que destaca un fermoso retablo dorado do S. XVII cunha gran escultura de Santa Elena e un órgano do S. XVIII decorado con motivos vexetais e animais que no verán é utilizado para concertos dentro das Rutas Palentinas do Órgano Barroco.

  Despois de admirar o magnífico marco no que íamos cantar e comprobar a súa boa acústica, comezamos a preparación previa ao concerto. 

   A velada iniciouse,ante un templo repleto de público, con varias pezas de temática navideña a cargo da coral Regina Angelorum, dirixida por Mª Belén Cordón Pérez, continuando coa intervención do Orfeón Lucense, dirixido por Marcos Fernández Mosquera co seguinte programa:

  - Drop, drop, slow tears. O. Gibbons.

  - Ecce novum gaudium. 17th century Scottish song books.

  - Es ist ein ´Ros´entsprungen. M Praetorius.

  - Eu hei-de m´ir ao presépio. M de Sampaio Riveiro.

  - Natal de Elvas. M. de Sampaio Riveiro.

  - Na noite máis fermosa. Adap. V. R. Abeijón.

  - Noiteboa. J. Castiñeira.

  - Ya viene la vieja. Trad. español. Harm.: A. Parker / R. Shaw.

 - Señor, oye mi voz. A. Cuevas Castillo / D. Cuevas Sánchez.

  - African Noël. Trad. africana. Adap. V . C. Johnson.

  - Dime, Niño, de quién eres. Popular.

  Rematada a audición, na que os espectadores participaron activamente, foille entregado a un representante da agrupación unha placa conmemorativa do noso paso por Grijota seguido dun ágape de confraternización, convidados xenerosamente polos nosos anfitrións.

  Tocaba despedirnos, agradecidos pola boa acollida, e voltar ao hotel para o día seguinte facer unha visita guiada pola cidade de Palencia; cidade que sorprendeu a todos agradablemente por humanizada, fermosa, sobria e cun gran interese artístico e patrimonial, do que son boa mostra a catedral, a terceira máis grande de España, e o museo, así como diferentes edificios modernistas, esculturas, templos e outras construcións civís.

   Enlazamos a continuación o programa de man do concerto. 

Misa na honra do Apóstolo Santiago

   Por iniciativa de Nicolás Ravelli, director da Xove Orquestra Terra Nova, fomos convidados, xunto con outros coros da cidade, a cantar a Misa na honra do Apóstolo Santiago, acompañados de dita orquestra.

   Antes do Nadal de 2023 xa participamos nunha actividade semellante con nove corais de toda a comunidade no Auditorio de Galicia acompañados pola Real Filharmonía, dirixidos por Javier Fajardo baixo o título de Proxecto Cantamos.

   Agora tratábase de traer a idea a Lugo para levala a cabo cos coros locais. Enseguida nos ilusionou a participación e, despois dos ensaios correspondentes coa orquestra Terra Nova, tivo lugar o concerto na Igrexa de San Pedro ante un numeroso público que abarrotou o templo.

   No altar maior da igrexa, que fixo de escea, situáronse Sólo Voces, Coro do Hospital, Coro de Fingoi e Orfeón Lucense. Diante de nós a orquestra co seu director e o concerto botou a andar. Nel puideron escoitarse todas as partes que compoñen unha misa completa, tal como a compuxo Xoán Montes:

   - Kyrie.

   - Gloria.

   - Credo.

   -Sanctus.

   - Benedictus (a capela)

   - Agnus Dei.

   Actuou como coro principal a agrupación Sólo Voces e todos os demais incorporámonos nas partes correspondentes, segundo o acordado

   A interpretación foi moi aplaudida polos asistentes, tras o cal estreamos unha peza de Enrique Alvarellos, compositor, director e escritor lucense finado no 2004, titulada Canta, meu grilo, que Nicolás Ravelli adicou á familia do falecido, presente no recinto.

   Finalmente, soou un bis, que, a petición dos músicos da orquestra, constituiu unha sorpresa instrumental para os espectadores: Suspiros de España, pasodobre composto por Antonio Álvarez Alonso no 1902.

   Dado o éxito da experiencia, seguro que haberá un próximo proxecto que logre aglutinarnos para seguir desfrutando da Música.

   A continuación inserimos unha imaxe da actuación.

   

   

Concerto no Pregón de Semana Santa 2024

   Desde hai varios anos vimos sendo invitados a dar un breve concerto para inaugurar o Pregón da Semana Santa Lucense. 

   Nesta ocasión prologamos ao pregoeiro D. Andrés Ramos Castro, sacerdote e xornalista, director do Secretariado da Pastoral Universitaria de Madrid, oriundo de Lalín e formado no Seminario de Lugo; de aí a súa relación con esta cidade.

   O acto tivo lugar na igrexa da Nova e a participación do Orfeón consistiu na interpretación do seguinte repertorio:

   - Allein Gott in der Höh sei Ehr. F. Mendelssohn Bartholdy.   

     Nacho Samena: órgano.

     Abraham Sánchez Pujante: frauta.

   - Giesù sommo conforto. G. Savonarola.

   

   - Vero amore è Gesù. S. Razzi (recop.)

   - Jesu Rex admirabilis. G.P. da Palestrina.

   - Locus iste. A. Bruckner.

   

   - In Monte Oliveti. J. Naujalis.

   No vídeo que enlazamos a continuación o Orfeón Lucense interpreta Allein Gott in der Höh sei Ehr  de Félix Mendelssohn.

   

Proxecto ´Cantamos´ no Auditorio de Galicia

   O 21 de decembro, tal como se dixo nun post anterior, tivo lugar en Santiago de Compostela un concerto colaborativo de dez coros galegos dirixidos por Javier Fajardo e acompañados pola Real Filharmonía de Galicia.

   O proxecto´Cantamos´, que botou a andar en setembro convocando ás corais que estiveran interesadas nel, foi traballado de maneira individual en cada agrupación e posto en común en tres ensaios no Auditorio de Galicia, dous deles vocais con acompañamento de piano e o último coa orquestra.

   Participamos neste acto as seguintes agrupacións:

   - Orfeón Terra a Nosa

   - Grupo Vocal Sólo Voces

   - Coral Harmonía Stellae

   - Coro de Cámara Thalassa

   - Coral Polifónica Salcedo

   - Coro do Hospital de Lugo

   - Coro Fingoi

   - Orfeón Lucense

   - Coro Asubío

  -  Coro de adultos da Escola Municipal de Música de Santiago

   O chamamento foi respondido coa asistencia duns 270 coralistas, cuxa colocación na escea requeriu unha instalación de gradas, quizáis nunca experimentada no Auditorio, rodeando as tres paredes que conforman o espazo de actuacións. Merece ser felicitada a persoa que organizou tanto o emprazamento dos cantores como os movementos de entrada e saída na escea pola precisión e rapidez coa que se executaron.

   As obras interpretadas foron:

   - Fidelio. Obertura. L. van Beethoven.

   - Misa em honra do Apóstolo Santiago. Xoán Montes. Arr. Joam Trilho.

   - Merry Christmas Beethoven. Juan Durán.

   Abriu o concerto a Real Filharmonía coa Obertura de Fidelio que deu paso ás obras corais todas elas seguidas con gran atención por un numeroso público que encheu o aforo.

  Cabe destacar a sonoridade de toda a Misa de Xoán Montes e a emotividade do Benedictus interpretado sotto voce sen acompañamento orquestral. En canto á obra de Juan Durán, encantounos a idea de artellar panxoliñas universais sobre melodías de Beethoven ben coñecidas para rematar cun FELIZ NAVIDAD!!! sonorísimo de todos os participantes.

   Merece unha mención especial quen organizou todo este complexo proxecto, Javier Fajardo, pola súa valía persoal e profesional, pola idea de achegar aos coros amateurs á profesionalidade dunha gran orquestra como é a Real Fliharmonía e pola afabilidade e a cercanía coa que fomos tratados en todo momento.

   Ao remate da actuación foron chamados á escea os directores de todos os coros e Juan Durán, compositor de Merry Christmas Beethoven, que foron obsequiados co aplauso dos asistentes.

   Non é fácil expresar con palabras a emoción de formar parte deste acto nun marco tan memorable e percibir a vibración de cada son que emitimos  potenciado polas distintas harmonías vocais e instrumentais de tantos músicos e cantores.

    Sentímonos moi recompensados polo noso traballo e esperamos que haxa unha nova ocasión.

    A imaxe corresponde ao momento final do concerto no Auditorio de Galicia.

   

   

   

   

   

 

   

   

   

Concerto en Burela

  A primeira actuación deste curso foi na Casa da Cultura de Burela por invitación da Coral Polifónica de dita localidade que retomaba a actividade co seu I Concerto de Outono despois dun tempo de pausa.

 Compartimos escea coa agrupación anfitriona e a Rondalla Estrelecer de Fene, dirixidas por Lucía Expósito Martínez e Javier Amado, respectivamente.

  En primeiro lugar a Rondalla Estrelecer interpretou as seguintes composicións:

   - Canción del mar. Adap. Javier Amado Fdez.

   - India. Adap. Javier Amado Fdez.

   - El mar. Adap. Javier Amado Fdez.

   - Río de Camalotes. Versión Javier Amado Fdez.

   - O vira vira. Fuxan os Ventos.

   A continuación o Orfeón, dirixido por Marcos Fernández Mosquera, interpretou o seu repertorio:

   - Gabriel's oboe. E. Morricone. Arr. P. Rowlands.

   - Ó rama. Popular portuguesa. Arr. A. Martins.

   - Bullerengue. Ritmo colombiano. Arr. J. A. Rincón.

   - La flor. E. Martínez Torner.

   - Cando vexas. Popular galega. Arr. J. Castiñeira.

   Cerrou o turno de actuacións a Coral Polifónica de Burela que ofreceu aos asistentes estas  pezas:

   - Senhora do Almurtao. Trad. de Portugal. Harm. Julio Domínguez.

   - Guantanamera. Joseíto Fernández. Arr. Electo Silva.

   - Siyahamba. Canción zulú.

   - Quen puidera namorala. Letra: A. Cunqueiro. Música: E. Batallán.

  Hai que destacar que neste concerto facían o seu debut catro compoñentes do noso coro: Ricardo Coria Abel, María Paz Gómez Cabanas, Rosa Souto Saá e Trinidad  Vázquez Luaces; todos eles coa ilusión natural da súa primeira vez.

  Despois das actuacións as tres corais compartimos un ágape de confraternidade que rematou con cantos compartidos e afectuosas mostras de agradecemento e despedida.

  Nas imaxes, un momento do noso concerto na Casa da Cultura de Burela.

   

   

   

Concerto de Nadal 2022 (IV)

   James Pierpont, compositor, arreglista e organista estadounidense, compuxo polo 1850 unha peza baixo o título The one horse open sleigh que trata da alegría que proporciona o paseo nun carro tirado por un cabalo.

   Esta composición de estrutura clásica na súa harmonía publicouse no 1857 en Boston como canción de inverno pero foi reimpresa no 1859 co título de Jingle bells e descoñécese quen lle cambiou o texto para que se convertise nunha das melodías de Nadal máis coñecidas en todo o mundo.

   O Orfeón quixo volver ás orixes desta melodía e interpretou a súa primeira  partitura da que enlazamos o audio a continuación:

    Solista: Javier Pérez-Schofield.

    Percusión: Guadalupe Enríquez Parga

Orfeonlucense · The one horse open sleigh.mp3

Concerto de Nadal 2022 (III)

   Francisco Guerrero é xunto con Tomás Luís de Victoria e Cristobal de Morales un dos compositores senlleiros do Renacemento español cuxa extensa obra relixiosa e profana tivo proxección en Europa e nos países pertencentes á coroa española da época.

  Deste autor é Niño Dios d'amor herido, fermosísima peza a catro voces pertencente á colección Canciones y villanescas espirituales que un cuarteto de cantores do Orfeón ofreceu de maneira especialmente harmónica e equilibrada neste concerto de Nadal.

   A continuación inserimos o audio:

    Intérpretes:

       Sara Pérez Cruz, soprano.

       Beatriz Enríquez Parga, contralto.

       Carlos Rodríguez Otero, tenor.

       Marcos Fernández Mosquera, baixo.

   

Orfeonlucense · Niño Dios d'amor herido

Concerto de Nadal 2022 (II)

   Adicaremos unha mirada máis detida ás pezas con solistas do Concerto de Nadal.

  A primeira delas é Gaudete, vilancico anónimo en latín do s. XVI, cuxo retrouso anima a aledarnos polo nacemento do Neno Xesús.

  Pertence ás Piae Cantiones, colección de cantos en latín medieval publicados en 1582, difundidos polas igrexas reformadas de Suecia e Finlandia e cantados nas súas escolas desde o S. XVIII ata a actualidade. De Suecia foron levados ao Reino Unido polo embaixador inglés desde onde foron editados e difundidos aos demais países.

  Foi unha elección moi interesante a interpretar polo Orfeón tanto pola mensaxe que contén como polo ritmo medieval, irregular e dinámico que aporta ao noso repertorio.

   Tras unha introdución inicial do retrouso entonada por Carlos Rodríguez Otero, repítese polo coro acompañado de percusión que no sucesivo se alterna coas estrofas interpretadas ad libitum polos solistas Carlos Rodríguez, Carlos Sánchez, Guadalupe Enríquez e Silvia Nadela.

   Enlazamos o documento sonoro a continuación:

Orfeonlucense · Gaudete

IV. Noite Coral. As voces da Cidade

 Recuperamos o formato da Noite Coral, sen restricións, tal como foi concebido antes da pandemia e nunha noite espléndida, mesmo impropia destas latitudes, iniciamos a serie de concertos que compoñen este circuito artístico e espiritual polos templos da cidade e o Círculo das Artes.

  Orfeón Lucense, Sólo Voces, Coro do Hospital e Gruppo vocale San Bernardo interpretaron concertos sucesivos en San Pedro, San Froilán, A Nova e Círculo das Artes, respectivamente, dando tempo aos seus seareiros a trasladarse dun lugar ao outro.

   O repertorio interpretado polo Orfeón foi o seguinte:

   - O salutaris ostia. Pierre de la Rue.

   - Cristo al morir tendea. Fra Marc'Antonio da San Germano.

   - Gabriel, el Ángel. Trad. vasca. Harm. E. Pettman. Trad. Carlos Rodríguez.

   - Adoramus te, Christe. Theodore Dubois.

   - Virgo Gloriosa. Johan August Söderman.

   - Cantico dell'Agnello. Marco Frisina.

   Tras os concertos de cada agrupación, ás corais anteriores uníronse o Quartetto di Brescia aos trombóns e Nicolás Varela ao órgano, e todos dirixidos por Giulio Mercati interpretamos tres pezas de polifonía renacentista a 12 voces no altar do Bo Xesús da Catedral:

   - Sapientiam omnium. Jacob Handl.

   - Super flumina Babylonis. Luca Marenzio.

   - Tota pulchra es, amica mea. Hieronymus Praetorius.

  Foi unha experiencia intensa e emocionante que compensou todo o traballo e esforzo que supón a preparación dun evento destas características con persoas que, nalgúns casos, vivimos a miles de kilómetros de distancia.

   Durante unhas horas a cidade encheuse de harmonías diversas e marabillosas que os afeccionados á música sacra coral e os intervintes no acto puidemos desfrutar, ao tempo que un percorrido polo casco histórico nun solpor fermosísimo de verán completou unha xornada de música e convivencia cuxos ecos perdurarán nos nosos ouvidos por moito tempo.

   Na imaxe dous momentos da Noite Coral: Concerto do Orfeón e concerto final.

Concerto dentro do Festival de Órgano

  Por primeira vez o Orfeón Lucense foi convidado por Giulio Mercati a participar no Festival Internacional de Órgano do Corpus Christi. Tivemos a honra de ser acompañados por Misty Schaffert, organista de talla internacional que soubo realzar coa súa sutileza e bo facer as nosas interpretacións.

 O numeroso público congregado na catedral puido desfrutar dun magnífico e variado repertorio para órgano desde o século XVII ata a actualidade e dunha selección de pezas para coro e órgano e coro a capella desde o século XV ata os nosos días.

 Desde o primeiro momento a empatía entre a organista e o coro deu como resultado unha experiencia única, emocionante e enriquecedora que ninguén de nós esquecerá.

  O Orfeón Lucense estivo dirixido por Marcos Fernández Mosquera, a excepción da última composición na que o fixo Silvia Nadela Villarino, actuando como solista na segunda peza Sara Pérez Cruz. O programa completo pode verse neste enlace.

  Eis unha imaxe do concerto. Premendo nela pode escoitarse o audio dunha das pezas interpretadas polo Orfeón: Geistliches lied (Johanes Brahms).

                                 Fonte: Catedral

   

Letras Galegas 2022

  Despois do parón cultural provocado pola pandemia, reanudamos, por fin, un dos actos senlleiros da nosa literatura. No eido da música, cunha xuntanza de todos os coros de Lugo na Praza Maior para honrar as Letras Galegas cantando fermosas pezas na nosa lingua.

 Cada unha das agrupacións corais interpretou dúas pezas no temprete e para finalizar todos xuntos cantamos outras dúas composicións nas escaleiras do fondo da Praza, tal como figura no programa do acto.

 Foi unha estupenda tarde de confraternización na que cantores e asistentes desfrutamos ata o final da música coral en galego. 

 Eventos así deben repetirse con este motivo e con outros porque fomentan a boa relación que xa existe entre as distintas agrupacións á vez que contribúen a que sintamos e respiremos conxuntamente  a Música todos os que somos amantes dela.

 As dúas pezas interpretadas polo Orfeón Lucense foron dirixidas por Marcos Manuel Fernández Mosquera e Silvia Nadela Villarino, respectivamente:

     - Canto de berce para unha princesa negra. A. R. Sabanés.

     - Ao pasar por Camariñas. Trad. galega. Arr.: Julio Domínguez.

  Na imaxe un momento da actuación conxunta de todos os coros no fondo da Praza Maior:

Música para salvar vidas

   Por invitación do Mestre de Capela da Catedral, D. Luis Varela Castiñeira, o Orfeón foi invitado a cantar no concerto de góspel africano que o grupo Aba Taano ofreceu na sé a beneficio dos nenos e xoves máis desfavorecidos de Uganda.

  Esta actividade é unha iniciativa da ONG Música para salvar vidas, fundada por varios cidadáns españois para dar formación a infantes e adolescentes ugandeses protexéndoos ata que son capaces de valerse por si mesmos.

 Foi unha experiencia marabillosa e diferente na que poidemos desfrutar de polifonías africanas, tan cheas de enerxía, espontaneidade e sonoridade, e dalgunhas melodías de espectáculos musicais e cinematográficos interpretados polo grupo visitante.

  O Orfeón Lucense actuou en primeiro lugar co seguinte repertorio:

   

  - Más cerca, oh Dios! de Ti. L. Mason.

  - Gabriel's oboe. E. Morricone.

  - Canto de berce para unha princesa negra. A. R. Sabanés.

  - Swing low. W. Willis. Arr. Josli.

  - O rama. Popular do Baixo Alentejo.

 

                                                                           Aba Taano            

                                     

                                                                  Ensaio do Orfeón Lucense

Concerto de Nadal 2021

   A cita habitual que tén o Orfeón Lucense con todos os seus seareiros celebrouse este ano na Catedral. Nun día que invitaba pouco a saír da casa foron numerosas as persoas que acudiron a escoitar o noso Concerto de Nadal.

  Estivo dirixido por Marcos Fernández Mosquera, o seu titular, quen artellou un repertorio moi atractivo para os ouvintes. Foi o seguinte:

    - Qué bonito niño chiquito. Cancioneiro da Colombina. Anónimo s. XV.

    - Dadme albricias. Cancioneiro de Upsala. Anónimo s. XVII. 

             Solista: Sara Pérez Cruz.

    - Drop, drop slow tears. O. Gibbons.

    - En una choza. M. Praetorius.

    - Linda Noite. Popular do Algarve.

    - Noiteboa. X. Castiñeira.

    - Ya viene la vieja. Trad. español. Harm.: A. Parker e R. Shaw.

    - Nosa Señora. 

    - Na Noite máis fermosa. Adap.: V. R. Abeijón.

    - Campana sobre campana. Popular de Andalucía. Harm.: J. L. Blasco.

    - Adeste fideles. J. Reading.

    - Los Reyes Magos. A. Ramírez e F. Luna. 

             Solistas: Dayana Pérez Brandón (charango).

                          Manuel Alejandro Varela González (guitarra).

                          Guadalupe Enríquez Parga (tamboril).

Concerto e misa. Igrexa de San Froilán

    Debido á situación de pandemia que estamos a padecer o Orfeón viuse obrigado a cambiar o lugar habitual de ensaio. A parroquia de San Froilán, e en particular os seus párrocos, Gerardo Arias López e José Manuel Penela Campos, brindáronnos o seu estupendo local parroquial que vimos utilizando desde o comezo de curso. 

 Con este motivo gañamos amigos aos que agradecemos de corazón a súa xenerosidade e cos que  colaboramos cantando unha misa e ofrecendo un pequeno concerto.

 O Orfeón estivo dirixido por Marcos Fernández Mosquera, director titular, coa colaboración de Silvia Nadela Villarino en dúas das das pezas.

  Repertorio da misa:

- La Virgen sueña caminos. C. Erdozáin.

- Señor ten piedad. Misa Alrededor de tu Mesa. F. Palazón.

- Santo. Misa Pascual. X. Castiñeira.

- Cordero de Dios. A. Taulé. 

- O pan do ceo. X. Portas Ferro e Isauro G. Ramos.

Repertorio do pequeno concerto:

- En una choza. M. Praetorius.

- Adeste fideles. J. Reading.

- Na noite mais fermosa. Adap.: V. R. Abeijón.

- La vieja. Trad. español. Harm.: A. Parker e R. Shaw.

- Noche de Paz. F. X. Gruber. ( conxuntamente cos nenos do Coro da parroquia de San Froilán).

Concerto en Pontedeume

  A Coral Polifónica de Chantada e o Orfeón Lucense foron invitados pola Coral Polifónica Eumesa para celebrar o Concerto de Santa Icía.

 O concerto tivo lugar na Igrexa Parroquial Monumental de Santiago de Pontedeume. Un amplo e fermoso templo no que se mesturan o neoclásico, o barroco e o gótico tardío e que alberga no seu interior o sepulcro de Fernando de Andrade entre outros elementos de gran valor artístico. Causounos unha moi grata impresión ver o marco no que iamos cantar, despois dunha viaxe na que o bo tempo non acompañou.

   Orfeón Lucense, Coral Polifónica de Chantada e Coral Polifónica Eumesa dirixidas por Marcos Fernández Mosquera, Marcos Fernández Varela e Xosé Paz Fernández, respectivamente, interpretaron os seus programas tal como figuran no díptico que se adxunta máis abaixo.

   Ao final do acto a coral eumesa entregou unha placa conmemorativa a unha das súas coralistas que cumpría 25 anos na formación e sendos agasallos ás agrupacións invitadas. Rematou a xornada cun ágape de confraternidade entre todos os membros.

    A continuación enlazamos o audio dunha das nosas pezas do concerto: La flor ( E. M. Torner). Pica na imaxe superior para escoitalo.

Concerto de outono

   Por invitación do Orfeón Xoán Montes este sábado concurrimos a Coral Polifónica de Agolada e ambos Orfeóns para dar un concerto de outono no Círculo das Artes.

 Ante unha gran afluencia de público, a pesar da climatoloxía adversa, cada coral interpretou o seu repertorio, comezando pola pontevedresa, dirixida por Alejandro Piñeiro. A continuación actuou o Orfeón Lucense dirixido por Marcos Fernández Mosquera e por último o Orfeón Xoán Montes baixo a batuta de Miguel Ángel Mouriz.

 Finalmente as tres corais, Coral Polifónica de Agolada, Orfeón Xoán Montes e Orfeón Lucense interpretaron xuntos, acompañados da gaita galega, a peza popular galego-portuguesa A saia da Carolina.

  Ao remate do concerto o coro anfitrión entregou sendos agasallos aos representantes das corais convidadas.

   A continuación enlazamos o tríptico  do concerto no que figuran os tres repertorios interpretados no acto así como unha breve historia das tres agrupacións corais.