Este luns. día 10 de marzo, o Orfeón Lucense estivo presente cos seus cantos no funeral institucional de Paula Alvarellos, que foi alcaldesa de Lugo ata a súa prematura e inesperada morte o día 1 deste mes.
A misa estivo oficiada polo prelado da diócese, D. Alfonso Carrasco Rouco, e concelebrada por varios coengos. Actuou como condutor da cerimonia D. David Varela, Rector do Seminario, e contou coa presenza da familia da exalcaldesa en lugar preferente, da Corporación Municipal, autoridades civís, militares e eclesiásticas, así como numeroso público que enchía o templo en boa parte.
O oficiante durante a homilía lembrou á finada que en tantas ocasións estivera presente nos oficios da catedral con motivo de distintas celebracións e festividades como persoa afable e entregada á súa cidade.
O Orfeón, dirixido por Abraham Sánchez Pujante, director do departamento de Música Litúrxica da Diócese e acompañado ao órgano polo prefecto de Música, Luís Varela Castiñeira; interpretou o seguinte repertorio:
- Kyrie en Re Majeur. J. P. Lécot.
- El Señor es mi pastor. Salmo.
- Interleccional. J. Castiñeira.
- O salutaris. L. Perosi.
- Santo de Lourdes. J. P. Lécot.
- Agnus Dei. Messe peuples de la Terre. J. P. Lécot.
- Yo soy el pan de vida. S. Toolan.
- Más cerca, oh Dios. L. Mason.
Nas imaxes, dúas instantáneas do acto tomadas das redes sociais do Concello de Lugo.
