domingo, 30 de decembro de 2012

Concerto de panxoliñas

Marcos Fernández dirixindo o Orfeón Lucense
O sábado, 22 de decembro, tivo lugar no altar do Bo Xesús da Catedral de Lugo un concerto de Nadal coa participación dos orfeóns Lucense e Xoán Montes, de acordo co seguinte programa:

Orfeón Xoán Montes (dirixido por Miguel Ángel Mouriz Lamas)

Puer natus (Antiga lauda natalicia).
Que ocurre en Judá - Sebastián Valero.
No portal naceu (arranxos de Enrique Alvarellos).
O sol da primavera - José Torres Creo.
Puer natus est (Antiphona ad introitum VII)
Neno que naces tan pobre - Enrique Alvarellos.
Bailan los pastores (anónimo s. XVII)
A maitines - Valdivielso/J. Cantó.


Orfeón Lucense (baixo a dirección de Marcos Fernández)

Dadme albricias (Cancioneiro de Upsala, s. XVII)
Canto de berce - Rogelio Groba.
Nosa Señora (Recompilatorio Galicia canta ao Neno)
El cant dels ocells (arr. Pau Casals) Solista: Silvia Nadela.
Panis angelicus - Cesar Frank. Organista: Nemesio Gutiérrez. Solistas: Silvia Nadela/ Marcos Fernández.
Señor oye mi voz - Antonio Cuevas.
Noche de Paz - Franz Gruber. Solista: Santiago Díaz de Freijo.
Campana sobre campana (arr. José L. Blasco).
Adeste fideles.



O Orfeón Lucense durante a presentación polo seu Presidente, Xulio Xiz



xoves, 27 de decembro de 2012

El cant dels ocells

O fermoso vilancico catalán que popularizara Pau Casals, interpretado polo Orfeón Lucense no concerto de panxoliñas da Catedral. A solista é Silvia Nadela Villarino.

Noche de paz/Noite de paz

O clásico vilancico tal como soou no concerto de Nadal na Catedral de Lugo, baixo a dirección de Marcos Fernández; solista, Santiago Díaz de Freijo.
(Montaxe de Silvia Nadela)

Nosa Señora fai medias

xoves, 20 de decembro de 2012

Os Cantos de Nadal volven hoxe ao centro de Lugo

Os Cantos de Nadal volven hoxe para animar as rúas de Lugo. O programa de concertos de Nadal posto en marcha hai tres anos pola área de cultura da Deputación, en colaboración coas corais de Lugo, chega á súa terceira edición e este ano contará coa participación do conxunto volcal Lugh, o coro Ecos do Miño, a coral Amigos do Camiño de Santiago, o coro Novo Amencer, o coro Cantar Delas, a coral Polifónica do Xeral de Calde, o Orfeón Xoán Montes, a Schola Gregoriana Lucense, a Asociación Cultural Coro de San Antonio, a coral Polifónica Xolda e o Orfeón Lucense serán os grupos encargados de actuar nesta edición.
Os cantos do Nadal interpretados polas corais de Lugo poderanse ouvir nas rúas de lugo hoxe e mañá, así como os días 27 e 28, desde a Praza do Campo ata a Rúa da Raíña, ou a Praza maior.

sábado, 8 de decembro de 2012

Misa da Inmaculada

Como outros anos, o Orfeón cantou na misa solemne en honra da Inmaculada Concepción que se celebrou na Catedral de Lugo e presidiu o bispo da diócese, D. Alfonso Carrasco Rouco.

Programa:
Que hermosa sois
Misa, de F. Palazón
O salutaris hostia, de Lorenzo Perosi.
Benedicat vobis, de Händel.
Más cerca, oh Dios, de Ti, de  Sarah Flowers Adams (versións en español e galego)


xoves, 29 de novembro de 2012

XXV Aniversario da Escola Oficial de Idiomas


Dirixe Marcos Fernández; salón de actos do Conservatorio de Música. 


Programa:

O salutaris hostia (Lorenzo Perosi)
Dadme albricias (villancico s. XVI)
Canto de berce (R. Groba)
Eu de Marín ausenteime
Maite (Pablo Sorozábal)
Va pensiero (Verdi)
Swing low, sweet charriot
Noche de paz
Benedicat vobis.

xoves, 22 de novembro de 2012

Cumpreanos do Padre Mato

Na Nova e coincidindo co día de Santa Cecilia, o Orfeón participou nunha homenaxe ao seu director, Xesús Mato, polo seu 80º aniversario, cantando na celebración da misa e ofrecendo un breve concerto posterior.

(Foto: La Voz de Galicia)
Programa:
(No coro)
Canticorum jubilo
Misa de Palazón: Santo e Señor ten piedad
Misa de Castiñeira: Año de Deus
O salutaris hostia, de Lorenzo Perosi.
Mas cerca oh Dios de Ti
(No altar)
Va pensiero, de Verdi.
Swing low
Canto de berce
Benedicat vobis, de Händel

mércores, 14 de novembro de 2012

venres, 26 de outubro de 2012

Nun libro de Galinova


O Orfeón Lucense, no libro de música de 1º de Eso da Editorial Galinova 



Unha fotografía do Orfeon Lucense co seu Director, Xesús Mato, obtida na escalinata do Pazo Bispal de Lugo, figura entre as ilustracións do libro de MÚSICA, publicado por Galinova Editorial para o primeiro ciclo da ESO.


Das agrupacións corais de Galicia aparecen fotografías, ademais da do
Orfeón Lucense, a da Coral Polifónica El Eco (A Coruña), o Real Coro Toxos
e Frores do Ferrol e a Coral de Ruada de Ourense.

Polo que á provincia de Lugo se refire tamén figura a Banda Municipal de
Chantada, a portada de “Galicia canta ao neno” de Fuxan os Ventos e
cadanseu retrato de Xoán Montes e Florencio, o cego dos Vilares.
O libro, promovido polo equipo didáctico desta editorial coruñesa, editado
en galego e centrado na música desde unha perspectiva galega, enmárcase no
“Proxecto Século XXI”.

X. X. (Orfeón Lucense), 2012-10-24

(en Galicia Dixital)

xoves, 27 de setembro de 2012

Pasamento de Enrique Aguiar (Igrexa de San Pedro)

Familia e Amigos de Enrique Aguiar: O Orfeón Lucense vén de cantar e vai seguir cantando na honra de Enrique, un dos seus compoñentes máis veteranos, e un dos que participaba connosco con maior fervor.
Estou, estamos seguros, de que Enrique nontiña moi claro onde remataba a súa familia e onde comezaban os seus amigos. E nós tampouco, porque Enrique era da familia. No decurso dos anos, os compoñentes deste colectivo van entrando nel. E algúns vanse porque as circunstancias o esixen, e outros quedan toda a vida. Enrique era dos de toda a vida. Amaba o canto con todas as súas forzas. E amaba o Orfeón como só se quere á familia, e á propia vida.
Tenme contado que na súa longa vida de traballo viaxeiro programábase para volver a Lugo a tempo dos ensaios do orfeón. E onte a súa familia confiábame que ten cortado as vacacións, aprazado xuntanzas familiares, para cumprir co que consideraba un deber: cantar no Orfeón.
Nesta súa enfermidade ten asistido como espectador a diversos concertos, e todos llo agradecíamos porque sabíamos da súa devoción, e el sabía que contaba co agarimo de todos nós, gañado momento a momento en máis de tres décadas como compañeiro entusiasta.
E este Corpus, no que o Orfeón -como coro da Catedral- cantou nas solemnidades relixiosas, Enrique subiu as empinadas escaleiras do coro da Catedral, e, situándose xunto a nós, púxose a cantar. Non importaba que a súa voz non soase, impedida polas eivas da enfermidade: el era parte imprescindible do Orfeón, e cantaba con el.
E agora correspóndenos o difícil labor de despedir a Enrique, que deixará de estar fisicamente connosco. Pero sabemos que sempre estará aquí... Dunha banda, porque a súa filla María José forma parte vital da nosa agrupación, co entusiasmo de seu pai. Pero de xeito especial porque a xente como Enrique, entusiasta, alegre, compañeira, pode irse co corpo, que o corpo é feble e cansa, pero quédase coa alma, inmortal, viva sempre, que se reflicte en todos os actos da vida, e en Enrique era manifestación permanente de bonhomía, de participación, de ser e de estar, de trascender.
En ocasións coma esta, eu creo que o Orfeón canta mellor ca nunca, porque tamén lle sae da alma. E o que cantamos é para todos vós, pero especialmente para Enrique, que seguro nos acompaña co canto, no sentimento. A Enrique gustáballe especialmente que Marcos, o noso director adxunto -o primeiro director, Xesús Mato, vai oficiar a misa- cantase a Ave María de Schubert. Porque hoxe cantamos para Enrique as súas cancións, as que deixou pedidas, como o Sweet low, que tamén soará. Hoxe cantamos con Enrique, para Enrique. Porque niso somos tremendamente ricos. Cada un dos compoñentes que se vai déixanos marcados, co seu carácter, co seu entusiasmo, coa súa participación. Enriquécenos.
Enrique era do Orfeón; o Orfeón é de Enrique. Cando cantemos, canta Enrique Aguiar. E todos estamos convencidos de que, agora mesmo, cando aplaudamos, aplaudimos tamén a Enrique, e el correspóndenos   -coma sempre- co seu sorriso de home de ben, familiar, amistoso, de todos nós, noso.
Por Enrique Aguiar, compañeiro e amigo!

domingo, 9 de setembro de 2012

O Cebreiro

O curso abriuse para o Orfeón Lucense no Cebreiro. Dirixidos por Marcos Fernández, cantamos na celebración da Misa do Milagre para a multitude de leoneses e galegos que enchían o campo da festa.





sábado, 23 de xuño de 2012

Arde Lucus 2012

Invitado polo Concello de Lugo, o Orfeón non quixo faltar á festa en que os lugueses e luguesas celebran as súas orixes romanas.
Na Praza do Cantiño, escoltado pola lexión VI e baixo a dirección de Xesús Mato, o Orfeón ofreceu, en palabras do seu presidente, Xulio Xiz, un breve percorrido pola historia da música, con diferentes cancións en latín e galego. Previamente, Ramón García realizou unha breve representación moi aplaudida polos asistentes.



 

domingo, 8 de abril de 2012

Domingo de Pascua

Programa:

Resucitó, de K. Argüello.
Misa Pascual de J. Castiñeira: Señor ten piedad e Gloria.
Aleluia de Josquin des Prez.
Misa Pascual: Cordero de Dios.

Comuñón: Ecce Panis, de J.A. Moreno Fuentes.
Ti é-lo Pan do Ceo.
Reina del Cielo, de J. Castiñeira.

domingo, 1 de abril de 2012

Domingo de Ramos

Debido ás obras de restauración do Altar Maior da Catedral, a Misa de Ramos celebrouse na capela do Bo   Xesús, e o Orfeón cantou desde o triforio.

Programa:
Cantos da Misa a partir do Ofertorio (órgano suave a cargo de D. José Molejón)
Ofertorio: Ave verum, de Mozart.
Santo e Año de Deus, da Misa galega de José Castiñeira.
Comuñón:
Locus iste, de A. Bruckner (a capela).
Más cerca, oh Dios, de Ti.
Canticorum jubilo.

luns, 19 de decembro de 2011

En Betanzos

O pasado 18 de decembro, o Orfeón Lucense actuou na Aula de Cultura Liceo durante a VI Mostra de Corais 2011 e 43º Festival de Nadal que organizou a Coral Polifónica de Betanzos. Ademais desta, participaba tamén a Coral Polifónica Estradense.
Após a actuación das tres agrupacións tivo lugar un intercambio de obsequios e, tras a visita ao excelente belén móbil instalado na Casa da Cultura, unha cea de confraternidade verdadeiramente cordial.






sábado, 12 de decembro de 2009

Reseña

O Orfeón Lucense estreará o día 18 unha panxoliña inédita de Xoán Montes
 Os artistas invitados son: Nemesio Gutiérrez, Raúl Galego, A Quenlla, Mini e Mero, Noemi Mazoy e Pilocha

C. López   
12/12/2009

A nova etapa do Orfeón Lucense, con Xesús Mato como director, botará a andar, no que ás actuacións se refire, o vindeiro día 18 cun concerto especial de Nadal, no que esta formación estará acompañada no escenario por unha serie de artistas invitados, como Mini e Mero, as compoñentes femininas de A Quenlla, Noemi Mazoy, Pilocha, o gaiteiro Raúl Galego e o organista Nemesio Gutiérrez, que ademais ocupou durante varios anos a presidencia do Orfeón Lucense.
Este concerto, de entrada libre, constará de dúas partes: unha primeira composta de pezas clásicas universais de diferentes países europeos e de temas populares españois, e unha segunda formada por panxoliñas populares galegas. Entre unha parte e outra terá lugar unha estrea de luxo: a dunha panxoliña inédita de Xoán Montes, que leva por título En Belén hai moita festa.
A presentación deste concerto tivo lugar onte na galería Sargadelos de Lugo e correu a cargo de Xulio Xiz e Xesús Mato, presidente e director, respectivamente, do Orfeón Lucense, de Ramón García Otero, director de actividades desta formación, e de José Antonio Vázquez, alcalde de Begonte. Este será precisamente un dos concellos no que se celebre este concerto especial de Nadal, que tamén terá lugar en Vilalba. Estes concertos non se limitarán a ser unha mera interpretación de pezas, senón que haberá unha explicación previa de cada unha, para que o público saiba de que van.

Noemi Mazoy actuando ante algúns membros do Orfeón Lucense

venres, 1 de agosto de 2008

A festa do Orfeón Lucense, por Xulio Xiz

Efectivamente, fixemos festa os compoñentes do Orfeón Lucense, agrupación que me honro en presidir.

Coidamos que a ocasión o merecía, se temos en conta que se cumpriron cento vinteoito anos desde a fundación do primeiro Orfeón por Xoán Montes, e vintecinco desde a refundación polo lembrado José Castiñeira Pardo, crego e músico, mestre de música da Catedral, o que tamén nos ten convertido desde este “re-nacemento” no coro oficial da Catedral lucense.

Por pouco non somos o primeiro de Galicia, pero aínda que Xoán Montes é un dos músicos galegos máis destacados, gañoulle pola man por pouco Pascual Veiga, tamén desta terra, tamén inspirado compositor, que tivo no seu haber a creación e dirección de destacadas agrupacións musicais.

Xa que había que celebrar esta doble efeméride, miramos hacia atrás escribindo a nosa historia –a longa e a máis curta- do que se encargaron o musicólogo Juan Bautista Varela de Vega (lucense, académico en Valladolid, prestixioso investigador) e a profesora Ruth Fernández Fernández (escritora, investigadora e membro do Orfeón).

Premiamos a lucenses que fixeron e fan historia no mundo da música, entre os que están Mini e Mero (fundadores da mítica “Fuxan os Ventos”), o crego investigador Xesús Mato, o director Indalecio Fernández Groba, o compositor Alejandro Besteiro Silva, o organizador José García Gesto, o organista José Molejón, as cantantes Pilocha e Noemí Mazoy, e a título póstumo Enrique Alvarellos e Francisco Méndez. Así mesmo foron distinguidos os socios do Orfeón que levan participando desde a súa fundación, e a título póstumo Mercedes Álvarez Maristany.

Fixemos dous encontros de música sacra con este motivo, editamos unha medalla de Sargadelos, lembramos a figura do noso fundador e erguemos un monumento á súa memoria na nova Praza do Seminario, obra do escultor mindoniense Juan Puchades Quilis.

Un cuarto de século

Certo que houbo diversos actos relacionados con Lugo, a música, os cantores lucenses e o Orfeón, que rexistraron unha destacada asistencia por parte dos simpatizantes desta agrupación, de antigos membros, de lucenses que gostan da música, e non sabería dicir cal deles foi o máis entrañable ou digno de lembranza, pero o certo que unha vez rematadas as celebracións quédanos un regustiño satisfactorio por ter cumprido coa obriga que marcaba este aniversario. Porque cumprir vintecinco anos nunha agrupación cultural é moi importante, máis se arredor de nós temos moitos dos fundadores que ou seguen participando, ou –retirados da vida cantora activa – ven con simpatía e apoian moralmente a marcha da nosa colectividade.

Honramos ó fundador e ós que levan vintecinco anos como cantores mozos –a música fai novos ós que a practican-, publicamos un libro sobre douscentos anos de música na Catedral de Lugo, obra de Juan Bautista Varela de Vega, e inauguramos oficialmente local propio que, con traballo pero tamén con infinita satisfacción, temos aberto ós lucenses no número cinco da rúa Cruzamento.

Superada esta proba que nos impuxemos, haberá que buscar novas metas que nos marquen traxectoria e introduzan na nosa vida colectiva de ensaiar-cantar, marcada pola satisfacción permanente de facer o que nos gosta, ese punto de aventura que sempre convén nunha agrupación que só rexistra o peso da historia para camiñar repousada polos vieiros da música, e a responsabilidade do nome que levamos para saber que –por denominación, e tendo sempre moi en conta o resto das agrupacións lucenses- onde cheguemos queda moi clara a nosa procedencia e pertenza a unha cidade bimilenaria que –por antiga e por culta- sabe de música e de celebracións.
Futuro

Ninguén sabe o que o futuro lle depara. Pero estamos abertos a el. Queremos seguir disfrutando da música, de toda a música. Queremos seguir cantando, na Catedral e fóra dela. Se hai xa dezaoito anos representamos a zarzuela “Non chores, Sabeliña”, como homenaxe a Trapero Pardo aínda en vida; se creamos un “Concerto galego comentado” que seguimos a interpretar onde nos chaman; se levamos nove edicións de concertos internacionais de música sacra, non podemos deixar que as celebracións pasadas nos permitan recrearnos satisfactoriamente no realizado. Quédanos moito que facer, e estamos collendo carreira para seguir traballando pola música e por Lugo.

Galicia digital (1.08.2008)