martes, 7 de novembro de 2023
Participación no proxecto 'Cantamos'
luns, 30 de outubro de 2023
Misa 34 cabodano de D. Xosé Castiñeira
34º Cabodano de José Castiñeira Pardo, 29.10.2023
Pasado mañá, cúmprense 34 anos desde o pasamento do creador da Agrupación de amigos cantores que arroupan esta celebración, que levamos o nome de Orfeón Lucense, coro oficial desta S.I.C.B., ao que acompaña o organista da catedral, Xavier de Acosta.
Adóitase conmemorar de xeito especial as efemérides con cifras rotundas: os vinte, os trinta… pero o Orfeón, tendo presente o espíritu, a forza, o legado, e mesmo a presencia do noso Mestre, acordou lembralo ano a ano - e cúmprense 34 -, non só para doernos pola perda senón tamén para glorialo e gloriarnos polo ben que nos fixo ao facernos nacer, polo seu traballo na Igrexa e na música, e pola lembranza garimosa que deixou en todos os que o coñecemos e queremos.
Antes houbera un histórico Orfeón Lucense creado polo xenial Xoán Montes, que sólo era un recordo. E o noso -e voso – Don José quixo volvelo á vida dando ese nombre ao conxunto de voces cantoras dos varios grupos que dirixía. E nacemos de novo, renacemos, hai 41 anos.
E a estas alturas dun novo século, sentimos que seguimos sendo os mesmos, aínda que lóxicamente poucos quedamos daquel tempo xa lonxano; que seguimos tendo o mesmo ánimo que el nos insuflou, o mesmo amor á música, a mesma devoción polo canto… Que amamos as mesmas cousas, os mesmos lugares (especialmente esta gran casa, a primeira igrexa da diócese), que a mesma música nos da a mesma vida; que do mesmo xeito que somos fillos duns pais que nos fixeron nacer, todos nós – mesmo os que acaban de incorporarse nos últimos tempos -somos fillos musicais, espirituais, daquel crego tan humano, tan moderno que os rapaces de hai medio século buscabamos polos confesionarios para confiarlle as nosas angueiras.
Por iso estamos aquí, e estaremos todos os anos se Deus o quere, para cantar na súa lembranza e proclamar ata onde chegue a nosa voz que o noso Pai musical está máis vivo ca nunca na súa música, nas nosas partituras, nas nosas voces, no noso ánimo.
E cando a misa remate, iremos con todos os presentes que queirades acompañarnos ao Claustro da Catedral onde está enterrado para deixarlle unhas flores e outra canción, e tamén deixarlle flores ao seu irmán Don Manuel, que tanto nos ten comprendido e axudado nesta Catedral.
Se lembrando a D. José as grazas permanentes van implícitas, o Orfeón da as grazas máis expresivas á familia Castiñeira – Luis, sobriño, oficiante; súa irmá, seu cuñado… - que o P. Castiñeira fixo que sexan tamén da nosa familia, e sempre están connosco.
E xa que o tempo do alén é a “mellor vida”, felicidades, José Castiñeira, polos 34 anos desa vida mellor.
venres, 13 de outubro de 2023
Misa en Latín 2023
Organizada polos antigos alumnos da Escola de Artes e Oficios Artísticos Ramón Falcón acostuma a celebrarse o día 12 de outubro unha Misa en Latín na catedral como preludio da Feira Medieval e outras actividades organizadas por este colectivo neste último día das festas do patrón.
A misa foi celebrada no altar do Bo Xesús por D. Manuel Castro Gay, coengo desta Catedral, asistido por membros do colectivo mencionado máis arriba e contou coa asistencia de numerosos fieis, entre os que se encontraba un certo número de damas e cabaleiros vestidos con atuendos medievais que contribuiron a situarnos na época.
As diferentes partes da misa foron pronunciadas en Latín, tal como acostumaba a ser antes de 1965, ano no que o papa Pablo VI dixo a primeira misa en italiano, lingua á que se foron engadindo todas as demais.
O Orfeón Lucense situouse excepcionalmente na nave dereita da sé, e o repertorio interpretado nesta ocasión especial baixo a dirección habitual de Marcos Fernández Mosquera foi o seguinte.
- Adoramuste, Christe. Th. Dubois.
- Kyrie. Misa de Angelis. Gregoriano.
- Alleluia. Gregoriano.
- O salutaris hostia. P. de la Rue
- Sanctus. Misa de Angelis. Gregoriano.
- Agnus Dei. Gregoriano.
- Da que Deus mamou. Cantiga 77. Afonso X O Sabio.
- Canticorum Iubilo. G. F. Haendel.
Na imaxe, momentos previos ao inicio da Misa.
venres, 6 de outubro de 2023
Misa de San Froilán 2023
Puntuais á cita anual coa celebración do patrón de Lugo acudimos á Catedral de Santa María para cantar unha misa solemne.
Estivo presidida polo prelado da diócese, D. Alfonso Carrasco Rouco, foi concelebrada por diferentes membros do cabildo catedralicio e contou coa asistencia da Corporación Municipal encabezada por Dona Lara Méndez, alcaldesa de Lugo, e asimesmo coa presenza doutras autoridades.
Na parte musical estivo o Orfeón Lucense, dirixido por D. Marcos Fernández Mosquera, acompañado ao órgano polo coengo Prefecto de Música da Catedral, D. Luís Varela Castiñeira.
A continuación especifícase o repertorio interpretado:
- Procesional de entrada. J. Molejón.
- Señor ten piedade. Misa Galega. J. Castiñeira.
- Gloria. Misa Galega. J. Castiñeira.
- Amósame, Señor. Salmo.
- Aleluya. X. R. Estévez.
- Eiquí están, Señor. L. Sánchez.
- Santo. Misa Galega. J. Castiñeira.
- Año de Deus. Misa Galega. J. Castiñeira
- Eucaristía. Taizé / Fdez. León.
- Non vou só. I. García Ramos.
- Himno a San Froilán. J. Molejón.
Máis abaixo, un momento da celebración do Día do Patrón tomada da web de La Voz de Galicia na que se pode apreciar a numerosa concurrencia, a Corporación Municipal e o Orfeón Lucense no Coro da Catedral.
domingo, 24 de setembro de 2023
Concerto en Burela
sábado, 9 de setembro de 2023
Preparando a volta
Despois dun breve descanso estival, coa chegada da luz de setembro o Orfeón Lucense volta á actividade normal de ensaios e actuacións con entusiasmo e novos ánimos.
Para unha primeira toma de contacto reunímonos no local da agrupación e, tras os saúdos propios da situación, comezamos a preparar o primeiro concerto ao que fomos invitados pola Coral Polifónica de Burela baixo a dirección habitual de Marcos Fernández Mosquera.
Nas imaxes, momentos da actividade.
domingo, 20 de agosto de 2023
Misa da Nosa Señora
O 15 de agosto celebramos a festividade da Virxe dos Ollos Grandes, padroa de Lugo, cantando unha misa na súa honra na Catedral.
A misa estivo presidida polo prelado da diócese, D. Alfonso Carrasco Rouco. Actuou como organista D. Luís Varela Castiñeira, Prefecto de Música da sé, coa aportación das harmonías vocais do Orfeón, dirixido por Marcos Fernández Mosquera, interpretando o repertorio que se detalla a continuación:
-Himno a la Virgen de los Ojos Grandes. J. Ortiz Peña. Arr. J. Molejón.
- Señor ten piedad. Misa Alrededor de tu Mesa. F. Palazón.
- De pie a tu derecha. Salmo. L Elizalde.
- Aleluya. I. García Ramos.
- Ave María. T. L. de Victoria.
- Santo. Misa Alrededor de tu mesa. F. Palazón.
- Cordero de Dios. Misa Alrededor de tu mesa. F. Palazón.
- Hija de Sión. L. Deiss.
- Ave Verum. J. P. Lécot.
- Salve Regina. Gregoriano.
Concluída a cerimonia, os asistentes, celebrantes e Orfeón desprazámonos ao camarín da Virxe dos Ollos Grandes, obra de Casas Novoa, onde o concelleiro de transición ecolóxica e impulso rural, Miguel Fernández, fixo unha ofrenda floral en nome da Corporación Municipal.
Finalmente, o Orfeón Lucense interpretou a Cantiga nº 77 de Afonso X O Sabio, titulada Da que Deus mamou, na que se narra o milagre da curación dunha muller tolleita acontecido en Lugo e atribuído á Virxe.
Na imaxe, un momento da ofrenda floral.
martes, 18 de xullo de 2023
Misa da Virxe do Carme
Fomos invitados a cantar un ano máis a Misa da Virxe do Carme. Por obras de restauración na capela do seu nome, a celebración levouse a cabo na Igrexa de San Pedro.
A liturxia estivo presidida por D. Alfonso Carrasco Rouco, prelado da diócese, e nela o Orfeón Lucense interpretou o repertorio seguinte:
- Hija del pueblo. Música: Alberto Taulé. Letra: Ángeles R. Fontela.
- Kyrie. Misa de Lourdes. J.P.Lécot.
- Gloria. Misa de Lourdes. J.P.Lécot.
- Alleluia dit irlandes. J.P.Lécot.
- Ave Verum. J. P. Lécot.
- Sanctus. Misa de Lourdes. J.P. Lécot.
- Ave María. T. L. de Victoria.
- Himno a la Virgen del Carmen. M. Letamendia.
Igrexa de S. Pedro
domingo, 9 de xullo de 2023
V Noite Coral Lucense
sábado, 1 de xullo de 2023
Preparando a V Noite Coral
Faltan moi poucos días para que voces procedentes de lugares ben distantes no mapa poidamos encher de son a noite lucense.
O Gruppo Vocale San Bernardo, Sólo Voces, Son de corda e o Orfeón Lucense levamos un tempo preparando cadanseu recital individual e un concerto final conxunto na Catedral, acompañados polo Concentus Instrumentalis Lucensis, co que obsequiaremos a todo aquel que queira desfrutar de boa música coral. Merece a pena!!!
Eis a imaxe do cartel. Picando nela accédese ao programa.
luns, 19 de xuño de 2023
Misa da Ofrenda do Antigo Reino de Galicia 2023
luns, 12 de xuño de 2023
Misa de Corpus Christi 2023
A Praza de Sta. María un ano máis engalanouse para a celebración do Corpus Christi. Desde ben cedo dispúxose un altar rodeado de flores, distintivos eucarísticos nos balcóns do Pazo Episcopal e moreas de sillas brancas que acollerían os numerosos fieis congregados alí máis tarde.
A celebración estivo presidida polo prelado da diócese, D. Alfonso Carrasco Rouco, acompañado de distintos membros do cabildo e coa presenza das autoridades locais.
A climatoloxía benigna favoreceu a brillantez do acto, á que contribuiu a actuación da Banda Filarmónica, dirixida por Iván Martínez Sabio; o Coro do Hospital de Lugo, dirixido por Fernando Gómez Jácome; o Orfeón Lucense, dirixido por Marcos Fernández Mosquera e o acompañamento de órgano por Xavier de Acosta.
O repertorio interpretado foi o seguinte:
- O pan do ceo. X. Portas Ferro / I. G. Ramos.
- Señor ten piedad. Misa Solemne. J. Castiñeira.
- Gloria. Misa Solemne. J. Castiñeira.
- Glorifica al Señor. Salmo.
- Aleluya de los irlandeses. J. P. Lécot.
- Santo. Misa Solemne. J. Castiñeira.
- Cordero de Dios. Misa Solemne. J. Castiñeira.
- Pescador de hombres. C. Gabarain / B. Corona.
- Pange lingua. Gregoriano.
- Ave Verum. W. A. Mozart.
- Alabado sea el Santísimo. Tradicional.
- Tantum ergo. Gregoriano.
- Cantemos al Amor. J. I. B. de Sagastizábal.
Desfrutamos ademais da presenza do grupo tradicional Os Xílgaros que actuaron durante a procesión que tivo lugar polas rúas do casco histórico, como é costume.
Á recollida da procesión, que fora iniciada cun potente repique de campás, entoáronse os últimos cantos e rezos e pouco a pouco a praza foi volvendo ao seu ritmo habitual.
Na imaxe un momento previo á celebración.
xoves, 18 de maio de 2023
Letras Galegas 2023
domingo, 14 de maio de 2023
Ata sempre, César
Vimos de enterarnos do pasamento do noso compañeiro César. Hai persoas con tal carisma que semella sempre nos acompañarán, pero o devir da vida devólvenos á realidade, e iso é o que estamos a vivir neste momento.
César José Gómez formou parte da familia do Orfeón durante máis de corenta anos e foi un dos promotores do Coro Parroquial de San Francisco Xavier. A súa paixón pola música queda fóra de toda dúbida, tanto nos momentos oficiais como nos de lecer, nos que adoitaba arrancar a súa serie de cancións favoritas, entre as que estaba Don Facundo; cancións ás que nos sumábamos gustosos.
Filósofo, home de leis e de fe, líder natural, gran conversador, intelixente, sabio, dotado dunha simpatía espontánea; pero sobre todo, unha persoa chea dunha gran bondade que espallaba en calquera sitio que estivera, facendo gala dun humor limpo e chispeante.
Na seguridade de que el nos estaría acompañando, dirixidos por Marcos Fernández Mosquera, cantamos unha misa este domingo en San Francisco Xavier na que puxemos todo o noso sentimento. Este foi o repertorio:
- Más cerca, oh Dios. L. Mason.
- Señor ten piedad. Misa Alrededor de tu mesa. F. Palazón.
- Aleluya de los irlandeses. J. P. Lécot.
- Deus do universo. L. Olano.
- Santo. Misa Alrededor de tu mesa. F. Palazón.
- Cordero de Dios. Misa Alrededor de tu mesa. F. Palazón.
- Jesu, Rex admirabilis. G. P. da Palestrina.
- Anima Christi. M. Frisina.
O seu baixo profundo estará formando parte do mellor coro alí onde estea e quedará para sempre resoando nos nosos ouvidos. Ata sempre César.
A continuación inserimos as palabras que o noso Presidente, Xulio Xiz, escribiu para César, ás que nos sumamos, que foron lidas ao final do acto pola nosa compañeira Ángeles Rodríguez Fontela, por ausencia do seu autor.
luns, 1 de maio de 2023
Misa na Catedral de Astorga
luns, 10 de abril de 2023
Misa de Pascua de Resurrección 2023
domingo, 9 de abril de 2023
Vixilia Pascual 2023
O lume no adro da Catedral poñía unha nota cálida na noite bonancible da nosa cidade cando o prelado fixo a súa beizón xunto coa da auga. A ese momento seguíronlle as tebras e, por fin, fíxose a luz e vimos a sé chea de fieis.
Así comezaba a Vixilia Pascual que estivo presidida por D. Alfonso Carrasco Rouco e concelebrada por varios coengos. Nela o Orfeón, dirixido por Marcos Fernández Mosquera, interpretou o seguinte repertorio:
- Gloria. Misa de Lourdes. J. P. Lécot.
- Aleluya. I. García Ramos.
- Cristo resucitado.
- Jesu, Rex admirabilis. G. P. da Palestrina.
- Santo. Misa de Angelis. Gregoriano.
- Agnus Dei. Misa de Angelis.Gregoriano.
- Cristo ayer, Cristo hoy. J. P. Lécot.
- Cantico dell' Agnello. M. Frisina.
Unha vez rematados os oficios, todos os asistentes fomos obsequiados na sacristía cun ágape para celebrar a Pascua de Resurrección.
Un momento previo á beizón do lume
sábado, 8 de abril de 2023
Xoves Santo 2023
Venres Santo 2023
luns, 3 de abril de 2023
Misa de Domingo de Ramos 2023
Nunha mañá luminosa e despois dos exercicios previos no claustro da Catedral, o Orfeón Lucense comeza o camiño cara ao coro para situarse e esperar o inicio da solemnidade de Ramos.
Despois da beizón dos ramos na Praza de Santa María tivo lugar a misa presidida por D. Alfonso Carrasco Rouco na que a nosa agrupación actuou dirixida por Marcos Fernández Mosquera e acompañada ao órgano por Xavier de Acosta. O repertorio interpretado foi o seguinte:
- Dios mío, Dios mío. Salmo.
- Cristo por nosotros. F. Palazón.
- Pueri haebraeorum. T. L. De Vitoria.
- Santo. Misa Solemne. J. Castiñeira.
- Cordero de Dios. Misa Solemne. J. Castiñeira.
- Eucaristía. Taizé e A. Fdez León.
- Anima Christi. M. Frisina.
xoves, 30 de marzo de 2023
Pregón da Semana Santa 2023
Comeza a Semana Santa Lucense co Pregón no Círculo das Artes, este ano pronunciado por Miguel Ángel González Arias, Xeneral de Brigada e Xefe de Zona da Garda Civil da Comunidade Autónoma de Galicia.
O Orfeón Lucense, dirixido por Marcos Fernández Mosquera e acompañado ao órgano por Nacho Samena, tivo a honra de aportar a parte musical que iniciou o solemne acto interpretando un selecto repertorio de música relixiosa propio do momento que vivimos:
- Pueri haebraeorum. Tomás Luis de Victoria.
- Christus factus est. Martín de Villanueva.
- Cristo al morir tendea. Fra Marc Antoni da San Germano.
- Stabat Mater. Zoltan Kodaly.
- Ave Verum. Jean Paul Lécot.
- Anima Christi. Marco Frisina.
Na imaxe unha instantánea previa a este concerto.
mércores, 29 de marzo de 2023
Semana Santa 2023
Co Pregón no Círculo das Artes a cargo de D. Miguel Ángel González Arias, Xeneral de Brigada e Xefe de Zona da Garda Civil da Comunidade Autónoma de Galicia, dá comezo a Semana Santa 2023 en Lugo, declarada de Interés Turístico Galego
O Orfeón Lucense aportará a parte musical nos días máis senlleiros da Semana: Pregón, Domingo de Ramos, Xoves Santo, Venres Santo, Sábado Santo e Domingo de Resurrección.






















